Jaurlaritzak % 14 murriztu du 'Berria'ri ematen dion diru-laguntza

EH Bilduk salatu du Jaurlaritzak % 14 murriztu duela Berria egunkariari ematen dion diru-laguntza, eta hori euskararen "normalkuntzaren kontrako eraso argia" dela.

Xabier Isasi eta Estitxu Breñas koalizio abertzaleko legebiltzarkideek azaldu dutenez, Berria-k, "Euskal Herriko egunkari nazional euskaldun bakarrak", 210.000 euro gutxiago jasoko ditu, eta "oso egoera ekonomiko zailean" geratuko da.

Koalizioak gogor kritikatu du, gainera, erabakia "berandu" iritsi izana, "urteko azken hiruhilekoan, erabaki larri horri aurre egiteko aukerarik gabe".

EH Bilduren ordezkarien ustez, murrizketa horrek agerian uzten du Iñigo Urkulluren Jaurlaritzarentzat euskara ez dela "estrategikoa".

EH Bilduk azalpenak eskatu dizkio lehendakariari, eta argi adierazi nahi izan du ez dagoela tokian tokiko hedabidean sustatzearen kontra, Jaurlaritzak egingo duen moduan, baina ez zaio iruditzen horregatik "nazio mailako komunikabideak zigortu behar direnik".