Gizartea -
Emakumeen aurkako indarkeria
Atxilotu bat, telefonoaren kablearekin emaztea itotzen saiatzeagatik
Ertzaintzak Barakaldon atxilotu du 42 urteko gizonezkoa, eta bikotekidea iraintzea eta heriotza mehatxuak egitea ere leporatzen dio.
agentziak | erredakzioa
Ertzaintzak 42 urteko gizonezko bat atxilotu du Barakaldon (Bizkaia) telefonoaren kablearekin emaztea itotzen saiatzea leporatuta, Eusko Jaurlaritzaren Segurtasun Sailak jakitera eman duenez.
Atxiloketa atzo izan zen, bikotearen etxebizitzan, eta emakumea iraintzea eta heriotza mehatxuak egitea ere leporatzen diote.
Larunbatean izan zen gertakaria, eztabaida baten ondoren gizonak emakumeari ura jaurti eta labana sartuko ziola mehatxu egin ostean.
Gero, telefonoaren kablearekin itotzen saiatu zen, baina biktimak laguntza eske egin zituen oihuen aurrean, etxetik alde egitea erabaki zuen.
Bizilagun batek eman zion aterpea biktimari gau horretan, eta hurrengo egunean salaketa jarri zuen.
Izapide horren ondoren, Ertzaintza bikotearen etxean bertaratu zen eta gizonezkoa atxilotuta eraman zuen.
Biktimaren arabera, senarraren erasoak eta irainak etengabeak izan dira ezkondu zirenetik.
