Gizartea -
Emakumeen aurkako indarkeria
Kartzelara, urritasuna duen neska bati sexu erasoa egitearren Iruñean
Ustezko erasotzailea Iruñeko egoitza bateko 37 urteko langilea da eta, ustez, lan zentroan bertan gertatu zen erasoa.
AGENTZIAK | ERREDAKZIOA
Iruñeko egoitza bateko 37 urteko langile bat atxilotu eta espetxeratu dute, adimen urritasuna duen gaixo bati sexu erasoa egitea egotzita.
Iruñeko Udalak ohar bidez jakinarazi duenez, igandean gertatu zen erasoa gizonezkoak lan egiten duen egoitzan bertan. Biktima egoitzako gaixoa da eta adimen urritasun handia du.
Kasu horietarako protokoloa martxan jarri zuten eta biktima ospitalera eraman zuten erasoak eragindako zauriak sendatzera.
Ondoren, ustezko erasotzailea bilatzeko operatiboa jarri zuten martxan, hiritik irten zitekeenaren beldur.
Ordu batzuk geroago aurkitu zuten ustezko erasotzailea Nafarroa Beherea etorbidean eta, atxilotu ostean, polizia-etxera eraman zuten.
Ustezko erasotzailea atzo arratsaldean igaro zen epailearen aurretik eta espetxera bidaltzea erabaki zuen legegizonak.
_________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
