Gizartea -
Gorpu bat jaso dute
Espainiako soldaduek sei itsaslapur atxilotu dituzte Somalian
Piratak ihes egiten ari zirenean atzeman ditu Navarra fragatak, Panamako bandera zuen merkantzia-ontzi bateko segurtasun pribatuak erasoari aurre egin ostean.
Erredakzioa
Navarra fragatako soldadu espainiarrek ustezko sei itsaslapur atxilotu dituzte gaur Somaliako kostaldean, Panamako bandera zuen merkantzia-ontzi bati eraso egiteagatik.
Defentsa Ministerioak jakitera eman duenez, piraten txalupetako batean gorpu bat aurkitu dute militarrek. Gorpuak kalibre txikiko bala zauriak zituen.
Merkantzia-ontziari egindako erasoaren berri eman dio ''Atalanta'' operazioak Navarra fragatari. Piratak ihes egiten ari zirenean atzeman ditu fragatak, merkantzia-ontziko segurtasun pribatuak erasotzaileen kontra tiro eginez erasoari aurre egin ostean.
Bi txalupa eta baleontzi bat harrapatu dituzte Navarra fragatako soldaduek. Baleontzia ontzi inude gisa erabiltzea litzateke.
Identifikazioa
Espainiako fragatan dira itsaslapurrak. Bertan datuak hartu behar zaizkie, erasotako merkantzia-ontziko tripulatzaileek identifikatu baino lehen.
Somaliako Gobernu Federaleko ordezkariarekin harremanetan dago ''Atalanta'' operazioa, gorpua herrialde horretako agintarien eskuetan uzteko, fragatan baitago.
Era berean, merkantzia-ontziko armadorearekin kontaktuan jartzen saiatzen ari dira, ustezko piraten aurka akusazioa aurkezteko, bahiketa saiakera batengatik.
