Gizartea -
Erasoa
Gazte bat larri zauritu dute Lekeition, jipoia emanda
02:50ean bikote bati eraso dio larri dagoen gazteak. Neskari komentario matxista bat egin dio, eta haren bikotekidea labanaz zauritu du. Geroago, talde batek jipoia eman dio erasotzaileari.
AGENTZIAK | ERREDAKZIOA
Gazte batek gizonezko bat sastakatu du Lekeition, gaur goizaldean. Ondoren, erasotzaileari jipoia eman diote pertsona batzuek, eta Gurutzetako Ospitalera eraman behar izan dute, larri zaurituta. Oraingoz, ez dute inor atxilotu, ezta inor identifikatu ere.
Herrizaingo Sailak jakinarazi duenez, 02:50ean jaso da erasoa. Ordu horretan, gazte batek bikote bati eraso dio kalean. Hasiera batean, neskari komentario matxista eta iraingarri bat egin dio, eta ondoren labankada bat eman dio haren bikotekidea. Dirudienez, aurpegian hainbat zauri egin dizkio, eta Gurutzetako Ospitalera eraman behar izan dute.
Geroago, lagun talde batek erasotzailea jipoitu omen du. Aipatu iturriak zehaztu duenaren arabera, larri zauritu dute. Horregatik, erasotzailea ere Gurutzetako Ospitalera eraman dute.
Nolanahi dela, Ertzaintzak ez du lortu jakitea lagun talde horrek erasoa jasan duen bikotearekin zerikusirik duen ala ez.
Oraingoz, ez dute inor atxilotu, eta gertatutakoa argitze aldera, ikerketa abiatu dute agenteek.