Kaleratuko dituzten Barakaldoko bi bizilagunentzako etxebizitza bat eskatu dute

Ibarreta Auzo Elkarteak, Barakaldoko Arteagabeitia-Zuatzu auzokoa bera, eskaera egin dio udalerriko Udalari, xede izanik Udalak beharrezko larrialdi-neurriak hartzea datorren astean kaleratuko dituzten bi bizilagunek etxebizitza izateko aukera errazteko.

Elkarteak ohar batean jakitera eman duenez, datorren asteartean, hilaren 11n, 39 eta 59 urteko auzoko bi bizilagun kaleratuko dituzte (ama eta semea dira). Antza, orain arte, hileko 500 euroko alokairua izan dute; biak daude langabezian, eta bien artean, hilero, 900 euro biltzen dituzte.

"Jabeak ez du nahi alokairuarekin jarraitu, eta, nahiz eta beste etxebizitza baten bila buru-belarri ibili diren, alokairuak oso altuak dira, eta ezin diote alokairu bati aurre egin, izan ere, hori egitekotan arrisku handia izango lukete gizarte-bazterketa pairatzeko", ohartarazi dute.

Zehaztu dutenez, bizilagunek Udalera jo dute, "baina ez dute erantzun positiborik jaso"; auzo-elkarteak, hortaz, Udalari eskatu dio beharrezko larrialdi-neurriak hartzea, ahalik eta lasterren, lagun horiek aurre egin diezaioketen etxebizitza bat izateko aukera erraztea xede.

Duela egun batzuk, gizarte-bazterketaren aurka borrokatzen duen Berri Otxoak plataformak ere salatu zuen bi lagun horiek kaleratuko dituztela: "Ez diete irtenbiderik eman", Udaleko gizarte-zerbitzuetatik, esan dute.