Gizon bat atxilotu dute Gasteizen bikotekideari eraso egiteagatik

Gasteizko Udaltzaingoak 30 urteko gizon bat atxilotu du bart bikotekideari eraso egitea eta lesioak eragitea egotzita. Emakumea ospitalera eraman behar izan dute.

Udaltzaingoak ohar baten bidez jakinarazi duenez, erasoa bart gauean jazo da, Aranbizkarra auzoko etxebizitza batean. Agenteek etxeko atarian topatu dute gizona, eta atea ixten saiatu da, baina ez du lortu. Barrura sartutakoan, agenteetako batzuk ustezko erasotzailearekin geratu dira, eta beste batzuk etxebizitzara igo dira.

Emakumeak azaldu dienez, eztabaida izan du gizonarekin, eta horrek, halako batean, eraso egin eta sakelakoa apurtu dio.

Salaketok aintzat hartuta, genero indarkeriagatik atxilotu dute gizona. Gaur eramango dute epailearen aurrera.

Biktima, berriz, ospitalera eraman dute.

______________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.