Indarkeria matxistaren prebentzioa bultzatuko du Gasteizko Udalak jaietan

Abuztuaren 4tik 9ra iznago diren Andre Maria Zuriaren jaietan, indarkeria matxistaren prebentziorako estrategia martxan jarriko du Gasteizko Udalak. Jaiak errespetuz gozatzeko gazteei zuzendutako kanpaina horretan, LGTBI kolektiboa kontuan izango dute.

Miren Fernandez de Landa Berdintasuneko zinegotziak eta Mireia Espiau Berdintasun Zerbitzuko buruak azaldu dutenez, 'Jaietan ere LIBRE izan nonahi! Ospatu, Jardun, Erantzun' lelopean hainbat ekintza egingo dituzte.

Besteak beste, indarkeriaren aurkako eta erasoen prebentziorako informazio gunea indartu eta lekuz aldatuko du Udalak. Jaietan izan daitezkeen erasoei aurre egiteko, bi telefono jarriko dituzte herritarren eskura: Gizarte Larrialdietakoa (94 513 44 44) -24 orduz egongo da martxan-, eta Udaltzaingoarena (092).

Informazio-gunea

Generoko indarkeriaren prebentziorako informazio-gunea Independentzia eta Posta kaleen artean ezarriko dute, abuztuaren 4tik 9ra, eta 17:00etatik 23:00etara egongo da irekita.

Gainera, eraso matxistarik bada, hainbat zerbitzuri buruzko informazioa eskainiko diete gunera hurbiltzen diren emakumeei edo LGTBI kolektiboko lagunei. Halaber, zerbitzu espezializatuak erabiltzeko aukera eskainiko zaie.

Horrez gain, lantalde bat gazteak egon ohi diren tokietatik ibiliko dira, indarkeria matxistari aurre egiteko informazioa nerabeei helarazteko asmoz.