Ibarrangelun sexu erasoa egitea egotzita atxilotutako gizona, libre karguekin

25 urteko gizon bat atxilotu zuten asteartean Gernikan, Ibarrangelun sexu askatasunaren aurkako bi delitu leporatuta, ustez, bi sexu eraso egin baitizkie bi emakumeri. Dagoeneko epailearen aurrera eraman dute, eta libre karguekin utzi dute arratsaldean, ETBk aurreratu duenez.

Erasoak Ibarrangeluko ostatu batean gertatu ziren. Ertzaintzak jasotako salaketen arabera, emakume biak lotan zeuden eguna Elantxobeko jaietan igaro ostean. Gizonak, baimenik gabe, emakumeen oheetan sartu eta bati ustez sexu erasoa egin zion eta besteari sexu erasoa egiten saiatu zen.

Biktimek eta lekukoek gertatutakoaren harira emandako informazioari esker gizona identifikatu eta atxilotu zuten atzo arratsaldean, eta Gernikako polizia-etxera eraman zuten.

_____________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta / edo deitu doako telefono hauetako batera: 900 840 111 (Euskadin) edo 016 (Estatu osoan). Lehenak arrastoa uzten du fakturan eta telefonoan; bigarrenak, telefonoan. Beraz, ez ahaztu ezabatzea.