Delituek ia % 7 egin dute gora Euskadin urteko lehen seihilekoan

Delituen kopuruak 6,76 % egin du gora urteko lehen sei hilabeteetan Euskadin, 2018ko denbora-tarte berarekin alderatuta. Guztira, 44.814 arau-hauste egin dituzte.

Igoerarik altuena giza hilketa edo erailketa kasuetan izan da, 7 kasurekin eta % 40ko igoerarekin. Familiako tratu txarrek % 34,68 egin dute gora. 800 kasu egon dira. Etxeko eremuko ohiko indarkeriak, aldiz, % 3,5 egin du behera; 1.349 kasu izan dira.

Bestalde, jaitsierarik nabarmenena enpresetan indarra erabiliz egindako lapurretetan izan da, % 27; lehen seihilekoan, 28 lapurreta egin dituzte. Sexu-askatasunaren aurkako delituak ere jaitsi dira, kasu honetan, % 17,8. Ertzaintzak 71 eraso sexualen berri izan du, aurreko urtean baino % 6,6 gutxiago. Horrez gain, sexu-askatasunaren aurkako 178 arau-huste jaso dituzte, hots, % 21,6 gutxiago.

Delitu-egitateei dagokienez, ebasketen kasua esanguratsuena izan da, 14.430 lapurreta egin dituztelako, 510 gehiago. Bestalde, 7.424 maula izan dira, iaz baino % 14 gehiago.

Lurraldez lurralde

EAEn izandako delinkuentziaren gorakada Gipuzkoan bereziki nabaritu da, % 7,9 egin baitu gora. Bizkaian eta Araban, berriz, % 6,7ko eta ia % 4,9ko igoerak jaso dituzte, hurrenez hurren. Gipuzkoan, gainera, lau ebasketa izan dira, bi Bizkaian eta beste bat Araban.

Ertzaintzak 11.881 delitu erregistratu ditu Gipuzkoan, ibilgailuen lapurretek % 60 egin dute gora, eta saltokitan zein eremu itxitan indarra erabiliz egindako lapurretek % 22ko igoera izan dute.

Bizkaian, 26.601 delitu egin dituzte, 2018an baino % 6,7 gehiago. Familiako tratu txarrek % 56 gora egin dute (457 kasu), eta erailketa-saiakuntzak ia % 85eko igoera izan dute; enpresetan indarra erabiliz egindako lapurretek, aldiz, % 44 egin dute behera.

Azkenik, Araban, delituen kopurua 6.332 izan da, iaz baino % 4,9 gehiago. Izan ere, droga-trafikoak % 154 egin du gora, herri-osasunaren aurkako 567 delitu jaso zituzten. Gainera, trastelekuetan edo bestelako etxeko kanpoko ganberetan egindako lapurretek % 57,5 egin dute gora. Sexu-askatasunaren aurkako delituek % 55eko jaitsiera izan dute, 5 eraso (% 58 gutxiago) eta beste 27 arau-hauste (% 54 gutxiago).

Delituak hiriburuetan

Gorakadarik altuena Gasteizen izan da, % 7,23ko igoerarekin eta 1.000 biztanleko 17,3 deliturekin. Guztira, 4.315 jaso dira Arabako hiriburuan. Igoera nabarmenak jaso dira droga-trafikoren (% 133) eta familia eremuko tratu txarren (% 53) kasuetan.

Bilbon, 10.371 delitu egin dituzte, % 5,7 gehiago, 1.000 biztanleko ia 14,6 deliturekin. Kasu horretan, tratu txarrek % 65eko igoera izan dute, eta sexu-askatasunaren aurkako delituek % 26 egin dute behera.

Bukatzeko, Donostian, 2.736 jaso dituzte, 2018an baino % 5 gehiago. Hala ere, hiru hiriburuetako tasarik baxuena da. Beste hiriburuetan ez bezala, sexu-askatasunaren aurkako delituek (% 14) egin dute gora; 9 eraso jaso dituzte, iaz baino % 50 gehiago. Tratu txarrei dagokienez, familiako tratu txarrek % 35 egin dute behera. Dena dela, etxeko eremuko ohiko indarkeriak % 30 egin du gora.

_________________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.