Foru Gobernuak 5,6 milioi euro bideratuko ditu uholdeek eragindako kalteak arintzeko

Nafarroako Gobernuak 5,6 milioi euro bideratuko ditu uztaileko uholdeek Nafarroa erdiguneko zenbait herritan eragin zituzten kalteak arintzeko. Erdialdea leheneratzeko Batzordea ostegun honetan bildu da, eta diru-laguntzak Nekazaritza-sektoreari, kaltetutako herri horietako erakundeei eta azpiegiturak konpondu behar dituztenei emango dizkietela azaldu dute.

Hala, kopuru horretatik, 3,4 milioi nekazaritza eta abeltzaintzako konpentsazioei eta konponketarako laguntzei dagozkie; 0,89 milioi toki entitateen azpiegituretako kalteak konpontzeko erabiliko da; 0,62 milioi kalteturiko errepideetako bidezaintza egokia ezartzeko eta 0,7 Santsoainera iristeko zubi berri bat eraikitzeko.

Nekazaritza arloko laguntzetara bideratutako ekarpenari dagokionez, honela banatuko dute: 1,7 milioi toki entitateen nekazaritza azpiegiturak konpontzeko; 800.000 euro nekazaritza ustiategietan izandako galerak orekatzeko; 420.000 euro ureztatzaileen komunitateen nekazaritza azpiegiturak konpontzeko eta 500.000 euro uholdeek nekazaritza eta abeltzaintzako ustiategietan kalteturiko elementuak konpontzeko.

Bestalde, kaltetutako herrietako erakundeen kasuan, 2017-2019 Tokiko Inbertsioen Planaren baitan jasotako laguntza-eskaeren 890.593 euro larrialdi-izaerarekin bideratzea onartu du Erdialdea leheneratzeko Batzordeak. Zazpi udalerrik eskatu dituzte diru-laguntzak epe barruan (Erriberri, Oloritz, Orisoain, Pitillas, Puiu, Tafalla eta San Martin Unx) eta Mairagako Mankomunitatea.

Halaber, Santsoainera iristeko zubi berri bat eraikitzeko 700.000 euro inguru bideratuko dira. Dena dela, behin-behineko pasabidea kentzea eta beharrezko desbideratzeak konpontzea beharrezkoa izango denez, aurreikusitakoa baino diru gehiago bideratu beharko da.

Gainera, uholdeek kaltetutako errepideetan egindako lanen berri eman dute batzordean; orain arte, 625.659 euroko inbertsioa behar izan dute.