Gipuzkoako ehiztariek greba mugagabean jarraitzea erabaki dute

Gipuzkoako ehiztariek greba mugagabean jarraitzea erabaki dute aste honetan, aho batez. Martxoaren 2az geroztik daude greban. Dena dela, baikor mintzatu dira eta laster Gipuzkoako Foru Aldundiarekin akordioa lortuko dutelakoan daude. Bien bitartean, pazientzia eskatu diete kaltetuei.

Grebak animalia handien (basurdeak eta orkatzak) ehizari eragiten dio gehienbat, eta ondorioak izaten ari da basurdeen hazkundearen kontrolean.

Gipuzkoako Ehiztarien Elkartetik ziurtatu dutenez, administrazioarekiko harremanak hobetu dira, baina oraindik hainbat kontu adostu behar dituzte. Besteak beste, ehiza larriaren hitzarmena aldarrikatzen dute (lau urte darama berritu gabe). Horrez gain, Ulia mendian ehizatzea baimentzen duen epaiari men egitea eskatzen diote Aldundiari.

Hala eta guztiz ere, akordioa lortzeko oztopo nagusia beste bat da. Zehazki, basurdeek eragindako kalteen ordainak nori eta nola eman adostea da akordiorako oztopo nagusia.

Bestalde, basurdeen erasoak etengabeak direla-eta, berehala ehizatzen hasteko eskatu diete baserritarrek ehiztariei.