Bilboko Alde Zaharreko saltokietan 'lapurreta uholdea' izan denik ukatu du Udalak

Amaia Arregi Herritarren Segurtasunerako zinegotziak ukatu egin du Bilboko Alde Zaharreko saltokietan "lapurreta uholdea" egon denik, joan den astean merkatari talde batek salatu zuen bezala. Izan ere, 2019ko urtarriletik azarora bitartean 2018ko epe berean baino zazpi lapurreta gehiago izan dira, "eta hori nahiko genukeen joera ez den arren, ez da asaldatzeko zifra bat, ez baita igoera esponentzialik eman", zehaztu du.

Arregik "5. barrutiko presidente, auzokide eta Alde Zaharreko saltokietako titularren lagun gisa" azaldu duenez, deitzaileek ez zioten jakinarazi "Alde Zaharreko saltokietan lapurretak ugaritzearen kontra mobilizatzen ari zirela”.

Testuinguru horretan, abenduaren 14an Alde Zaharreko merkatarien elkarteko lehendakariaren dendara hurbildu zela erantsi du, baina elkarteak "ekimenaren atzean" ez zeudela erantzun zion.

Arregik esan du errespetatu egiten duela abenduaren 18an 31 merkatarik egin zuten protesta, baina azpimarratu du ez dela egia "azken hilabeteetan Zazpi Kaleetako saltokietan indarra erabiliz egindako lapurretak ugaritu direnik".

Herritarren Segurtasunerako arduradunak adierazi duenez, Bilboko Udaltzaingoaren eta Ertzaintzaren datuen arabera, Alde Zaharreko saltokietan, 2019ko urritik azarora bitartean, indarra erabiliz egindako lapurretak 15 izan dira, eta iaz ere beste horrenbeste izan ziren.

Oposizioa

Carmen Muñoz Elkarrekin Podemoseko zinegotziak kritikatu egin du Arregik "autokonplazentzia handiko kontakizuna" egin duela eta ziurtatu du Arregi "nahiko asaldatu" zela alkateak Zazpi Kaleetako saltokietako lapurretak 48tik 56ra igo zirela (% 17ra) entzutean. Horrez gainera, adierazi du ez dela Segurtasunaren alorraren betebeharra lapurretak azpimarragarriak diren ala ez definitzea, baizik eta 2018ko urtarriletik azarora 48 lapurreta izan baziren, aurten zifra hori jaisten saiatzea.

Bestalde, Jone Goirizelaia EH Bilduko bozeramaileak honakoa ohartarazi du: "Nola prebenitu behar den jakiteko, zer gertatzen den eta gauzak nola egiten diren jakin behar da, ondoren, segurtasun neurriak hartzeko". Garrantzitsuena kopurua ez dela adierazita, "lapurreta bat izatearekin nahikoa" dela nabarmendu du.

Carlos Garcia PPko zinegotziak Gobernuak ez duela "datuen interpretazio zuzena" egin adierazi du, eta gehitu du "inork ez duela ukatzen iaz lapurreta-uholde bat egon zenik, eta aurten lapurreta kopuruak behera egin beharrean, handitu egin dela". Era berean, abenduko datuak ahaztea kritikatu du, "merkatarien arabera, lapurreta gehien izan diren hilabetea delako".