Itxi

2020/01/14

12:04

Gizartea

San Sebastian Eguna

Ikusmen-desgaitasuna duten pertsonek danborrada inklusibo berria osatuko dute

Agentziak | Erredakzioa

Konpainia berria, Hamaika Danborrada Elkartea, 80 bat kidek osatzen dute, eta Sarriegiren martxen erritmoan abiatuko dira, Fernando Arrieta Danbor Nagusiaren gidaritzapean.

  • Urketarien jantzia berde eta hori kolorekoa da.

    Urketarien jantzia berde eta hori kolorekoa da. Argazkia: ONCE

  • Whatsapp
  • Whatsapp
  • Telegram
  • Bidali

Pertsona itsuek, ikusmen-urritasun larriak dituztenek, gor-itsuek eta ONCEko boluntarioek danborrada inklusibo berrian parte hartuko dute urtarrilaren 20an, San Sebastian egunean. Hala, ikusmen-desgaitasuna duten pertsonek hiriko erdiguneko kale nagusiak zeharkatuko dituzte, Donostiako ONCEren egoitzatik abiatuta.

Konpainia berria, Hamaika Danborrada Elkartea, 80 bat kidek osatuko dute, eta Sarriegiren martxen erritmoan abiatuko dira, 08:30ean, Fernando Arrieta Danbor Nagusiaren gidaritzapean, ONCEren egoitzaren aurretik (Arrasate kalea). Halaber, Juan Carlos Andueza ONCEko Euskadiko lurralde-ordezkariak, Rafael Ledesma ONCEko Euskadiko presidenteak eta Roberto Doval ONCEko zuzendariak ere parte hartuko dute bertan.

Danbor-jotzaileen jantzia berdea eta beltza izango da, eta urketariena, berdea eta horia (ONCEren kolore korporatiboak). Gainera, Frantziako Inperioko 1813ko Zalditeria Arina irudikatzen du. Banderak, berriz, Donostiako armarria darama brodatuta, ONCEren Oncelio logoaren ondoan.

Desfilatzeko, lau laguneko ilarak osatuko dira; horrela, itsuen segurtasuna bermatzeko, bi muturretan ikusten duten pertsonak ibiliko dira beti, eta erdian pertsona itsua edo gor-itsua, laguntzailearekin batera. Aurrealdean ere, emakume gor-itsu bat ibiliko da, bere txakur-gidariaren eskutik.

Donostiako ONCEn afiliatutako adineko pertsona talde baten ekimenaren ondorioz sortu zen danborrada bateratzailea. Pertsona horiek erronka berri gisa proposatu dute ekimen hau, itsuek edota ikusmen-urritasun larriak dituzten pertsonek era berean parte har dezaten Donostiako gertaera nabarmenetan.

Danborrada inklusiboa Urnietako Bozko Anitz bandarekin batera izango da, eta Raimundo Sarriegiren hainbat martxa interpretatuko dituzte, hala nola Diana, Retreta, Gau Bilera edo Tatiago. San Sebastian martxa ezagunarekin emango diote amaiera ibilaldiari. Horretarako, ONCEko Alaia abesbatzaren ahotsak batuko dira, Iñaki Cárcamoren zuzendaritzapean.

  • Bisitatuena

      Kargatzen ikusiena
      Kargatzen ikusiena
    ;