Gizon bat kartzelara, Berriozarren emakume bat mehatxatu eta hiltzen saiatzeagatik

Foruzaingoak 47 urteko gizonezko bat atxilotu zuen Berriozarren (Nafarroa) bikotekide ohia mehatxatu eta hiltzen saiatzea egotzita. Harengandik urruntzeko agindua urratu zuen, gainera.

Foruzaingoak gaur ohar batean azaldu duenez, eraso matxista larunbatean jazo zen Berriozarko taberna batean. Une jakin batean, ingurutik zebiltzan agente batzuek lau pertsona sesioan ikusi zituzten taberna baten kanpoaldean. Horietako bat —geroago atxilotu zuten gizona— bertatik joan zen eta inguruko arbola batean ezkutatuta zuen labana bat hartu zuen.

Aiztoa eskuan zuela bueltatu zen, baina Foruzaingoko agenteek eta Berriozarko udaltzainek geldiaraztea lortu zuten.

Gerora agenteek egiaztatu ahal izan zutenez, emakume bat eta bere alaba taberna barruan babestu ziren. Emakumeak Poliziari kontatu zionez, gizonak herio-mehatxuak egin zizkion, harengandik urruntzeko agindua urratuta.

Salaketa horren aurrean, agenteek ustezko erasotzailea atxilotu zuten, homizidio saiakera eta urruntzeko agindua urratzea egotzita. Ondoren, epaileak kartzelatzea agindu zuen.