Gizartea -
Indarkeria matxista
Adingabe bati sexu-erasoa egitea egotzita atxilotutako hiru gizonak, espetxera
Hiru atxilotuek aurrekari ugari dituzte delitu ezberdinengatik. Goizean epailearen aurrera eraman dituzte, eta honek espetxeratzera bidaltzea erabaki du.
Agentzia | Erredakzioa
Hiru gizon gazte atxilotu zituzten ostegunean, iragan asteburuan, Bilbon, adingabe bati sexu-erasoa egitea egotzita. Goizean epailearen esku jarri dituzte. Epaileak Basauriko espetxera bidali ditu.
Segurtasun Sailak jakitera eman duenez, hiru atxilotuek aurrekari ugari dituzte delitu ezberdinengatik. Goizean guardiako epailearen aurrera eraman dituzte, Ertzaintzak galdekatu ondoren.
Adingabea ospitalean artatu behar izan zuten. Ondoren sexu-erasoa salatu zuen. Antza denez, Solokoetxen eraso egin zioten.
Ertzainek 18 eta 21 urte arteko hiru gazte atxilotu zituzten ostegunean, sexu-erasoa leporatuta.
Bilboko Udalak erasoa gaitzesteko adierazpena argitaratu du. Udalbatzan ordezkaritza duten talde politiko guztiek testua berretsi dute. "Eraso matxista giza eskubideen urraketa larri eta onartezina da", salatu dute.
"Emakumeenganako edozein jokabide iraingarri", errefusatu dute, eta herritarrei erasoen aurka protesta egiteko eskatu diete. Zentzu horretan, Udalak erasoaren aurka protesta egiteko deitzen diren ekitaldi guztiekin bat egingo duela iragarri dute.
