Itxi

Gizartea

Koronabirus

Pedro Sanchezek koronabirusaren aurkako plan bat iragarri du

Agentziak | Erredakzioa

Osasun Ministerioak 999 kasu baieztatu ditu astelehen honetan Espainian. Gaur ezagututako kasuen artean, bost hilabeteko haurtxo batena dago.

  • Sanchez, Salvador Illa eta Fernando Simon koronabirusaren jarraipen bileran parte hartu dute

    Koronabirusaren Jarraipen Batzordearen bilera. Argazkia: EFE

Pedro Sanchez Espainiako Gobernuko presidenteak astelehen honetan iragarri duenez, Gobernuak "lehenbailehen" jarriko du martxan koronabirusaren aurkako plan bat, eta "batasuna, lasaitasuna eta egonkortasuna" eskatu ditu izurrite horri aurre egiteko.

Sanchezek koronabirusa jarraitzeko batzordea zuzendu du gaur goizean, eta izurrite horri buruzko argibideak "hitzez hitz" jarraitzeko eskatu die herritar guztiei, adineko pertsonak egiten ari diren bezala. Halaber, autonomia erkidegoetako gobernuen osasun gomendioak arretaz entzuteko eskatu du.

"Auzi honek ez du ideia eta koloreen arabera bereizketarik egiten", esan du Sanchezek, eta osasun krisiaren aurrean Espainiako Gobernua egiten ari den kudeaketa babestu du, eta Espainiak osasun sistema "bikaina" duela azpimarratu.

Osasun Ministerioak 999 koronabirus kasu baieztatu ditu astelehen honetan Espainian; gehienak Madrilgo Erkidegoan (469) eta EAEn (149) izan dira, hain zuzen ere, kezka gehien sortu duten eta neurri zehatzak hartu dituzten bi autonomia eskualdetan.

Fernando Simon Osasun Alerta eta Larrialdiak Koordinatzeko Zentroko zuzendariak prentsaurrekoa eman eta gutxira jakinarazi du Osasun Sailak ia mila pertsona kutsatu direla.

Agerraldia hasi zenetik, 16 pertsona hil dira eta 30 pertsonari alta eman diete orain arte, Simonek azaldu duenez; izan ere, autonomia erkidegoek emandako informazioaren arabera, datuak aldatuz doaz.

Ezagutu diren kasuen artean, bost hilabeteko haurtxo batena dago, Murtziako Virgen de la Arrixaca Ospitalean dago, eta, baieztatuz gero, Espainian kutsatutako umerik gazteena izango litzateke. Umetxoaren ama ere ospitalean dago, positibo eman baitu. Familia Madrilen bizi da, eta asteburua pasatzera joan zen Murtziara.

Madrilen eta EAEn ez ezik, beste erkidego batzuetan ere atzean dituzte positiboak: Errioxa (81), Katalunia (75), Andaluzia (54), Valentzia (37), Gaztela-Mantxa (26), Gaztela eta Leon (23) eta Kanariak (22).

Zerrenda horretan, Aragoi (13), Kantabria (12), Balearrak (11), Asturias (7), Extremadura (7), Galizia (6), Murtzia (4) eta Nafarroa (3) daude jarraian.

Ceutak eta Melillak konfirmatutako koronabirus kasurik gabe jarraitzen dute.

Koarentena Logroñon eta Errioxako hainbat herritan

Guardia Zibilak eta Polizia Nazionalak koronabirusak Logroñon eta Errioxako hainbat udalerritan eragindako hainbat kalteturi koarentenaren berri ematen jarraitu dute astelehenean, atzo Errioxako Haro udalerrian egin bezala, bertan baitaude kaltetutako gehienak. 

Osasun iturriek EFE albiste-agentziari azaldu diotenez, koarentena egin behar duten pertsona guztiei jakinaraztea erabaki dute, betetzen ari diren ala ez kontuan hartu gabe.

Agenteak jantzi bereziak zituztela bertaratu dira kaltetuei (horietako batzuk Haroko taldearekin lotuta daude) beren etxeetan egon behar dutela, eta, egin ezean, atxilotu egin ditzaketela eta 3.000 eta 600.000 euro arteko zigorrei aurre egin diezaieketela jakinarazteko.

Guardia Zibilaren Ekintza Azkarretarako Taldeko agenteak atzo goizean bertaratu ziren Harora, jakinarazpenak ematera. Hogeita hamar kaltetu baino gehiago daude bertan, joan den astean Gasteizko hileta-elizkizun batera joan ondoren.

Errioxako Osasun Kontseilaritzak gaur adierazi duenez, Errioxan 81 pertsonak eman dute positibo COVID-19 gaitza atzemateko proban.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Kontseiluaren telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.
  • Bisitatuena

      Kargatzen ikusiena
      Kargatzen ikusiena