Gizartea -
Emakumeen aurkako indarkeria
Abantok isiltasunean salatu du bi emakumeen hilketa matxista
Aterki azpian, eta koronabirusagatik agintariek eman dituzten distantzia aholkuak jarraituta, herritarrek udaletxeko plaza bete dute.
agentziak | erredakzioa
Abantok (Bizkaia) isiltasunean salatu du atzoko hilketa matxista bikoitza, udaletxearen parean egindako elkarretaratze jendetsuan. Gizon batek emaztea eta alaba hil zituen atzo.
Aterki azpian, eta koronabirusagatik agintariek eman dituzten distantzia aholkuak jarraituta, herritarrek udaletxeko plaza bete dute protesta ekitaldian. Bost minutuko isilunea egin ostean, txalo zaparradarekin amaitu da elkarretaratzea.
Maite Etxebarria alkateak eskerrak eman dizkie herritarrei Miren Uranga eta Paola Mendezen hilketak salatzera bertaratu direnei.
Etxebarriak "indarkeria matxistaren aurrean tolerantziarik ez" izateko eskatu die abantarrei, eta lagun diezaietela biktimen lagunei eta senideei, "uneoro gertutasuna eta maitasuna azalduz".
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta / edo deitu doako telefono hauetako batera: 900 840 111 (Euskadin) edo 016 (Estatu osoan). Ez dute fakturan arrastorik uzten, baina bai telefonoan. Beraz, ez ahaztu ezabatzea.
