Gizartea -
Koronabirusa
Euskadik 406.155 maskara jaso ditu Osasun Ministerioaren partetik
Guztira, Ministerioak 7,4 milioi maskara baino gehiago eman dizkie autonomia-erkidegoei.
Agentziak | Erredakzioa
Euskadik 406.155 maskara jaso ditu martxoaren 10etik Espainiako Gobernuko Osasun Ministerioaren partetik, koronabirusaren pandemian osasun-langileak babesteko abiatutako neurrien testuinguruan. Guztira, Espainiako Osasun Ministerioak 7.473.708 maskara eman dizkie autonomia-erkidegoei.
Salvador Illak zuzentzen duen Ministerioak emandako datuen arabera, orain arte, Madrilek, Kataluniak eta Andaluziak jaso dituzte gainerako autonomia-erkidegoek baino maskara gehiago; hain zuzen ere, 2.207.468, 957.633 eta 846.474 maskara eman dizkiete, hurrenez hurren.
Gainera, osasun-materiala erosteko duela egun batzuk Txinarekin abiatutako erosketa-eragiketetan 578 milioi euro erabili ditu Espainiako Gobernuak, itxitako kontratuen balioari erreparatuta, Illak gobernu-bileraren osteko prentsaurrekoan zehaztu duenez.
Azken erosketetan, 100 milioi maskara kirurgiko eskuratu dituzte, gaixoak babesteko, 3,5 milioi maskara FFP2 eta FFP3, osasun-profesionalak babesteko, nitrilozko 100 milioi eskularru, eta 260.000 ontzi soluzio hidro-alkoholikoetarako.
Guztira, 659 maskara kirurgiko erosi ditu Espainiako Gobernuak osasun-zentroetako gaixoentzat, eta 30,3 milioi maskara FFP2 eta FFP3 osasun-profesionalek segurtasun handiagoarekin lan egin ahal izan dezaten.
