Gizartea -
KORONABIRUSA
Elkartasun uholdea, Donostiako Ospitaleak urpekaritza maskarak eskatu eta gero
Ertzaintzaren Donostiako komisaria batetik eitb.eus-i baieztatu dionez, beharrak erabat ase dira eta oraingoz ez da horrelako maskara gehiago behar.
EITB.EUS
Koronabirusa dela eta, herritarrak etxean gauden honetan, asko ugaritu dira elkar zaintzeko deiak, eta osasun arloko langileek salatu dituzten material gabeziei aurre egiteko abian jarritako hainbat ekimen aurreikuspen guztiak gainditzen ari dira. Horixe gertatu da, adibidez, Donostia Ospitaleak sare sozialen eta whatsapp aplikazioaren bidez egin duen eskera zehatz batekin.
Decathlon markako snorkel edo urpekaritza maskarak eskatu dituzte; antza, arnasgailu gisa erabil daitezkelako. Bolo-bolo zabaldu den mezuak Donostiako komisaria bateko zenbakia ematen du, bertara deitu eta hango agenteek jasoko dituztela maskarak norberaren etxetik jakinaraziz.
Ekimena erreala dela baieztatu diote eitb.eus-i Donostiako komisaria horretatik eta harrituta daudela izan duen arrakastarekin: "Ikaragarria izan da eta Donostiako Ospitaleak behar zuen kopurua lortu dugu".
Horrenbeste jende ari omen zaie azken orduetan deika, komisariako telefonoa itota dutela, eta ondorioz, jendearen eskuzabaltasuna bihotz-bihotzez eskatu ondoren, jada ez dela behar eta ez gehiago deitzeko eskatu dute.
