Norberaren babeserako ekipamendua eskatu dute berriro ELAk eta LABek, Nafarroan

ELA eta LAB sindikatuek berriro eskatu dituzte osasun eta gizarte zentroetako eta anbulantzietako langileentzako babes ekipamenduak, eta iristen ez badira, epaitegietara joko dutela azpimarratu dute.

ELAk komunikatu batean aditzera eman duenez, Nafarroako langileek babeserako behar dituzten ekipamenduak jasotzen ez badituzte, administrazioaren erantzukizuna exijituko du epaitegietan.  

Koronabisuren krisia hasi zenetik osasun eta gizarte zentroetan ari diren langileentzako ekipamendua behin eta berriro eskatu dutela azpimarratu du ELAk, langile horiek "arrisku handian" daudelako eta gaixoak ere babestu behar dituztelako. Baina "erakundeek aurreikuspen eskasa dutela erakutsi dute, nahikoak ez diren protokoloak ezarriz". Protokolo horiek material eskasia dagoenerako pentsatuta daudela esan dute, eta ez osasuna zaindu eta COVID-19aren hedapena gelditzeko. Ondorioz, egoera “oso larria” dela diote, "ondorio oso larriekin".  

Halaber, ELAk anbulantzietako langileen egoera salatu du. Anbulantziak Osasunbidea Nafarroako Osasun Zerbitzuak azpikontratatutako zerbitzua da, eta langile horien lan baldintzak babesteko eskatzen dio gobernuari, langileei behar dituzten segurtasun neurriak eta atsedenak aplikatzeko.

"Profesionalak uniforme osoak falta direla salatzen ari dira, baita anbulantzia babesteko eta estalkia aldatzeko plastikoa, babeserako pantailak, pazienteentzako maskarak ere". "Nafarroako Gobernua da anbulantziek beharrezkoa duten guztia edukitzea bermatu behar duen erakundea", azpimarratu du ELAk.

Probak egitearen garrantzia

ELArentzat lehentasunezkoa da langileei koronabirusa antzemateko  probak egitea sintomak edukitzeari itxaron gabe. Langileak birusarekin kontaktu zuzenean daude eta kutsatuta egon daitezke horretaz jakitun egon gabe, inguruko pertsonak kutsatuz.

LABek, berriz, prentsa oharra atera du arreta eta osasun langileak oinarrizko zerbitzuak direla gogora ekartzeko, eta bestelako langile batzuk ere, baina ez denak, oinarrizkoak izan daitekeela adierazteko. Kasu horietan, "langileak inolako arrazoirik gabe arriskuan jartzen ari direla" salatu du sindikatuak.