Gizartea -
Koronabirusa
Tenperatura neurtzen hasiko dira astelehenean Euskadiko garraio publikoetan
37 gradutik gorako tenperatura duten pertsonak osasun arloko profesionalek artatuko dituzte, Eusko Jaurlaritzak ohar batean jakinarazi duenez.
Agentziak | Erredakzioa
Eusko Jaurlaritzak garraio publikoko erabiltzaileentzat tenperatura neurtzen hasiko da datorren astean, eta milioi erdi maskara banatuko dizkie, "soilik" garraio publikoan sartzerako unean babes hori ez duten bidaiariei.
Proba jardunaldi batzuen ostean, datorren astean jarriko dituzte martxan neurketak, eta Gurutze Gorriko langileak izango dira Araban eta DYAko langileak Bizkaian eta Gipuzkoan, haiek eramango dituzte Metro Bilbaoko eta Euskotreneko geltokietara, bai eta EAEko hiru hiriburuetako autobus-geltokietara ere.
37 gradutik gorako tenperatura duten pertsonak artatuko dituzte osasun langileek, Eusko Jaurlaritzak ohar baten bidez jakinarazi duenez.
Osasun Ministerioak eskatutako baldintzak betetzen dituzten lurraldeetan datorren astelehenean hasiko den deseskalatze fasearen aurrean, Eusko Jaurlaritzak ostiral honetan iragarri duenez, 500.000 maskara banatuko dituzte operadoreen artean, garraiatzen duten bidaiarien kopuruaren arabera.
"Operadore bakoitzak" egingo ditu babes elementu horien entregak, eta garraio publikoan nahitaez erabili behar dira, joan den astelehenean zero deseskalatze-fasea hasi zenetik,
BAT, Barik edo Mugi txartela dutenek Herritarren Arretarako bulegoetan jaso ahal izango dituzte maskarak.
Gainera, sarrera arautua duten geltokietan, bidaiariak hesi bidez kontrolatuko dituzte, era berean, gel higienizatzailea banatzeko gailuak jarriko dira atarietan eta nasetan.
Euskal Autonomia Erkidego osoan, COVID-19 pandemia baino lehenago egun bakar batean 758.719 pertsona zihoazen garraio publikoan, eta aste honetan, itxialdia malgutzeko 0 fasean, 137.623 bidaiari izan dira, hau da, aurreko astean baino % 35 gehiago.
Igoera "homogeneoa da, garraio mota guztietan eman dena", adierazi du Eusko Jaurlaritzak, eta datorren asterako garraio eskariaren igoera "aurreikusiko" da, "osasun agintariek COVID-19ri aurre egiteko ezarritako neurri guztiak betez".
Azpimarratu du "nahitaezkoa eta saihestezina" dela maskara erabiltzea, eta gogorarazi du erabiltzaileek ahalik eta distantzia handiena mantendu behar dutela geltokietan, autobus-geltokietan, nasetan eta trenaren, tranbiaren eta autobusen barnealdean.