Itxi

Gizartea

KORONABIRUSA

Sindikatuek geletara planifikatuta eta negoziatuta itzultzea eskatu diote Hezkuntzari

AGENTZIAK | ERREDAKZIOA

Langileen eta ikasleen osasuna bermatzeko beharrezkoak diren segurtasun-neurriak jasoko dituen plan orokor bat eskatzen dute.

  • Euskal hezkuntza publikoko langileek elkarretaratzea egin dute Gasteizen

    Euskal hezkuntza publikoko langileek elkarretaratzea egin dute Gasteizen. Argazkia: EFE

ELA, LAB, Steilas, CCOO eta UGT sindikatuek datorren ikasturtean ikasgeletara itzultzeko plan orokor negoziatu bat eskatu diote Eusko Jaurlaritzako Hezkuntza Sailari, langileen eta ikasleen osasuna bermatzeko beharrezkoak diren segurtasun neurriak jasoko dituena eta ikasleen arteko desberdintasunak saihestuko dituena.

Sindikatuek bilera batera deitu zuten asteazken honetan Hezkuntza Saila Eusko Jaurlaritzaren egoitzan, ikasgeletara itzultzeari buruz hitz egiteko, eta gela bat ere erreserbatu zuten, baina, salatu dutenez, eta "espero zuten bezala, ez da Sail horretako kargurik aurkeztu".

Aurretik, elkarretaratzea egin dute Jaurlaritzaren egoitza nagusiaren aurrean, Gasteizen, elkarrizketa eskatzeko, eta euren proposamenak biltzen dituen dokumentua aurkeztu dute.

Bestalde, Hezkuntza Saileko iturriek Eferi albiste-agentziari azaldu diotenez, gaurko bilera sindikatuek deitu dute, eta gogorarazi dutenez, bihar, osteguna, bilera bat dago antolatuta, hainbat gairi buruz hitz egiteko. Hezkuntza Sailak joan den astearen amaieran deitu zuen bilera, iturri horien arabera.

Sindikatuetako iturriek azaldu dutenez, berriz, biharko deialdia "ohiko bilera" da, eta urtero egiten dute, ikasturte amaieran, langileen inguruko hainbat gairi buruz hitz egiteko. Gaur eskatu duten eta egin ez den bilera Hezkuntzako Mahai sektorial bati buruzkoa zen, koronabirusaren pandemiaren ostean ikasgeletara itzultzeko prozesuaz hitz egiteko.

Uriartek zuzentzen duen Sailak ikasturte presentzialaren hasiera bat antolatuko du irailean Euskadiko irakaskuntzaren etapa guztietarako, osasun-egoerak aukera ematen badu. DBHko eta Batxilergoko ikasleak lanaldi jarraituan joango dira ikastetxeetara, eta beste aukera batzuk aztertuko ditu, egoera epidemiologikoak okerrera egiten badu eta agerraldiak gertatzen badira.

Eusko Jaurlaritzak hiru agertoki aurreikusten ditu COVID-19ak Euskadin ikasturtearen hasieran duen eraginaren arabera. Onenean irailaren 7an hasiko litzateke.

Ohar batean, bost sindikatuak kezkatuta agertu dira, bai Sailak haiekin biltzea saihestu nahi duelako, bai ikasturterako "aurreikuspen faltagatik".

Beldur dira itzulera planteatuko ote den kontuan hartu gabe hezkuntza-sistemak dakartzan egiturazko beharrak, hezkuntza-premia gehigarriak, ikasleen arteko arrakala handitzea, indartze-beharrak eta aurrez aurreko eskolak eteteak eragin dituen egoera bereziak.

"Ezinbestekotzat jotzen dugu Hezkuntza Sailak gure hezkuntza sistema osorako plangintza eta irizpide orokor batzuk eginda eta aurreikusita izatea, eta partekatuak, negoziatuak eta adostuak izatea", azpimarratu dute.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela; ahoa estaltzeko maskarak derrigorrezkoak dira garraio publikoan, baita kalean eta leku itxietan ere, bi metroko segurtasun-tartea bermatu ezin bada.
  • Bisitatuena

      Kargatzen ikusiena
      Kargatzen ikusiena