Gizartea -
Sagardotegiak
Gipuzkoako sagardotegietan afariak girotuko dituzte bertso eta musikarekin
Afariak Gipuzkoa osoan barrena egingo dituzte baina aurrez lekua hartu beharko da online, ekimena antolatzen duten elkarteen webguneetan.
AGENTZIAK | ERREDAKZIOA
Bertsozale Elkarteak eta Gipuzkoako Sagardogileen Elkarteak antolatuta, bertsoz eta musikaz girotutako afariak egingo dituzte Gipuzkoako sagardotegietan uztailean eta abuztuan.
Uztailaren 15ean emango diote hasiera egitarauari Adunako Aburuza sagardotegian. 20:30etik hasita, Unai Mendizabalek eta Eli Pagolak abestuko dituzte Aitor Mendiluzek jarritako gaiak.
Uztailaren 24an, berriz, arratsaldeko seietan hasita, Maialen Lujanbio eta Agin Laburu egongo dira Astigarragako Astarbe sagardotegian, afari-mokadua girotzen.
Gainera, uztailaren 27an, Astigarragako Petritegi sagardotegian, Aitor Mendiluze, Iker Zubeldia eta Imanol Camio arituko dira lanean. Ekimen honen uztaileko azken jardunaldia izango da, eta 20:30ean emango diote hasiera afariari.
Abuztuaren 7an jarraituko dute saioek, eta Saizar sagardotegian, Usurbilen, afari musikatua hasiko da 20:30ean. Abuztuaren 29an, Irungo Ola sagardotegian, bertso-afaria egongo da, eta han arituko dira Angel Peñagarikano, Sebastian Lizaso, Aitor Mendiluze eta Andoni Egaña, ekimenari amaiera emateko.
Lekua hartzeko, ekimena antolatu duten elkarteen webguneak erabili beharko dira: www.bertsosarrerak.eus eta www.sagardoa.eus.