Tratu txar edo sexu-erasoengatik artatutako adingabeen kopurua % 20 igo da Bizkaian

Bizkaiko Foru Aldundiko tratu txarren eta sexu-erasoen kasuetan familian esku hartzeko laguntza psikologikoko zerbitzuak tratu txarren eta/edo sexu-erasoen biktima izan ziren 117 adingaberi lagundu zien 2019an, hau da, aurreko urtean baino % 20,6 gehiago.

Artatutako % 76a neskak ziren eta % 24a mutilak. Sexuaren eta indarkeria motaren arabera, nesken erdiak baino gehiagok (% 52ak) sexu-erasoa edo sexu-abusua jasan zuten, gehienetan familia eremuan; eta gainerako % 18a bikotekidearen edo bikotekide ohiaren indarkeria-kasuak izan ziren. Haurren kasuan, % 74a etxeko tratu txarrei dagokie, eta gainerakoak sexu-indarkeriari.

Adinaren arabera, sei urtetik 17 urtera arteko kasuak artatu zituzten iaz. Gehienak (%80a) nerabeak ziren, 12 eta 17 urte bitartekoak, adin-tarte horretan hiru indarkeria moten kasuak biltzen baitira.

Hazkunde jarraitua

2019an, 1.568 pertsonak jaso zuten arreta zerbitzu honen bidez (horietatik% 89,5 emakumeak dira). Guztira, 1.400 inguru dira programak jorratzen dituen bi indarkeria-motetako baten biktima diren emakume eta neskak (1.374). Aurreko urtearekin alderatuta, artatutakoen kopuruak % 2,8 egin zuen gora 2019an.

Datuak kasu motaren arabera aztertzean, kasu berriek aurreko urteetako mailari eusten diotela nabarmentzen da. 2015ean 900 kasu berri baino gehiago izan ziren, eta ordutik bolumena kopuru horren inguruan mantentzen da.

Indarkeria familian

Artatutako pertsona gehienek familia barruko indarkeria-egoera baten ondorio psikologikoak gainditzeko tratamendu psikologikoa jasotzen dute. 2019an 1.129 pertsonak aurkeztu zuten eskaera hori, haietatik % 96,4a emakumeak.

Erasotzailearekiko harremanaren arabera, paziente berrien % 90ak bikotekideak edo bikotekide ohiak eragindako indarkeria-egoera pairatzen du. Datu horren arabera, 46 emakumek hasten dute terapia bat programan indarkeria mota horren ondorioz; 2006an, berriz, 23 kasu erregistratu ziren. Gainera, gehienek (% 83ak) seme-alabak dituzte ardurapean.

Sexu-erasoak

2019an, Bizkaiko Arreta Psikologikoko Zerbitzuak sexu-erasoaren ondorioz artatutako adineko emakumeen kopururik altuena aurkeztu zuen (105). Kasu berriak 2005etik izandako baliorik altuena dira (63 emakume).

Indarkeria-mota horretan, ohikoa den bezala, ehunekorik handienak adin-talde gazteenetan daude, eta hamar emakumetik lauk 18 eta 30 urte bitartean dituzte.