Elkarte gastronomikoek osasun neurriak betetzen dituzten ikuskatuko dute Donostian

Donostiako Osasun Publikoan lanean diharduten teknikariek eta Udaltzaingoak hiriko 102 elkarte gastronomiko ikuskatuko dituzte datozen egunetan, COVID-19ari aurre egiteko ezarritako segurtasun eta higiene neurriak betetzen dituzten jakiteko.

Goizean emandako prentsaurrekoan, Enrique Ramos Osasun Publikoko zinegotziak esan du agintariek konfinamendu amaieran ezarritako protokoloa zuzen betetzen ari direla ezagutzea dela asmoa.

"Elkarte guztiek protokoloak agindutako materiala jaso zuten, baita adostutako baldintzak jasotzen dituen txostena ere", adierazi du. Gainera, gogora ekarri du elkarte gastronomikoak txoko pribatuak izan arren ezarritako neurriak bete behar dituztela, arazoak saiheste aldera. Honakoak dira neurriok:

-Ezin dute elkartearen edukieraren erdia gainditu.

-Mahaien arteko distantzia gorde behar dute, baita mahaikideen artekoa ere.

-Sukaldean ezin da lagun-talde bakoitzetik bazkide bat baino gehiago sartu.

-Paperezko mahai-zapiak soilik erabil daitezke, hidrogela izan behar dute eskura eta sukaldeko tresnak 60 gradutik gorako tenperaturan garbitu behar dituzte.

-Bazkideak ezingo dira mahai-jokoetan (kartak eta antzekoak) aritu.

-Elkartean garbiketa sakona egin behar dute, gutxienez hilabetean behin, eguneroko garbiketa-lanak gorabehera.

Behin ikuskapena eginda, hutsegiteen berri emango diete elkarteetako zuzendaritza batzordeei, neurriak hobe ditzaten. Osterantzean, isuna jaso lezakete, eta beharrezkoa izanez gero, elkartea ixtea ere gerta liteke.