Ertzaintzak eta Udaltzaingoek kontrolak ezarri dituzte Inauterietako asteburuan

Ertzaintzak eta Udaltzaingoek lan prebentiboa egiten jarraitu eta kontrolak ezarri dituzte Inauterietako asteburuan, herritarrek ordu eta udalerrien arteko joan-etorrien murrizketak betetzen dituzten egiaztatzeko. Eusko Jaurlaritzako Segurtasun Sailak covid-19a hedatzea saihestu nahi izan du neurri horrekin.

Helburu berarekin, Ertzaintzako agenteek Bilbon Deustu auzoko Ugaskobidean edaten ari ziren gazte talde batzuk desegin zituen ostegun gauean, 21:00ak aldera. Artxandako tuneletatik gertu dauden kirol pista batzuetan zeuden, botilak eta edalontziak hartuta. Guztira, 93 pertsona identifikatu eta zigorra jasotzeko proposatu zituzten, osasun-egoerari aurre egiteko gaur egun indarrean dauden neurriak ez betetzea egotzita.