Gizon batek emakume bat hil du Ourensen

Gizon bat atxilotu dute goizaldean Ourensen 22 urteko emakume bat hil eta haren bikotekidea larri zauritzeagatik.

Efe albiste agentziak kontsultatutako iturrien arabera, 05:00ak aldera gertatu da hilketa Velle inguruko etxebizitza batean, eta ustezko erasotzailea atxilotu egin dute.

Hilketaren arrazoiak ikertzen dabil Polizia. Oraingoz, bikotearen bizilagun bat atxilotu dute.

Ourenseko Herri Segurtasuneko agenteek 05:00etan jasotako dei bati esker izan dute sastakatzearen berri.

Erasoa gertatu den lekura bertaratu direnean, 22 urteko emakumea hilik aurkitu dute, eta 25 urteko gizona, berriz, larri zaurituta. Berehala, ospitalera eraman dute, eta badirudi hobera egiten ari dela.

"Bizilaguna eta senitartekoa"

Erasotzailea etxean bertan atxilotu dute. "Biktimen bizilaguna eta senitartekoa da", nabarmendu du Polizia Nazionalak, atxilotu ostean.

Haren etxebizitza miatzen ibili direnean, emakumea hiltzeko erabili duen arma aurkitu dute. Oraindik, baina, gertatutakoa ikertzen dabiltza.