Gizartea -
Koronabirusa
EAEn txertoa jaso dutenen % 0,69k soilik eman dute positibo ondoren
Bigarren dosia jaso eta immunizazio prozesua betea dutenen kasuan, berriz, portzentajea % 0,15era jaisten da.
agentziak | eitb media
EAEn covid-19aren aurkako txertoa jaso dutenen % 0,69k soilik eman dute ondoren positibo koronabirusean, eta portzentajea % 0,15era jaisten da prozesua bete dutenen kasuan, hau da, bi dosiak jaso dituztenen artean.
Gotzone Sagardui Osasun sailburuak zehaztu duenez, martxoaren 2rako 138.847 dosi eman zituzten EAEn, eta horietako 49.033 bigarren dosia izan ziren. Gaurdaino 961ek eman dute positibo covid-19an dosiren bat jaso ostean; 75ek soilik bigarrena jaso ondoren.
Horrek esan nahi du txertoa jaso dutenen artean % 0,69k eman dutela positibo, baina tasa % 0,24ra jaisten da txertoa jaso eta 7 egunera positibo eman dutenak aintzat hartuz gero. Zazpi eguneko "erreferentzia" hori erabiltzen dute "defentsen sorkuntza ez delako berehalakoa", sailburuaren esanetan.
Bigarren dosia jaso eta immunizazio prozesua bete duten pertsonen artean, % 0,15ek eman dute positibo, baina soilik % 0,02k astebeteko epea igarota.
"Datu horiek ikuspegi argia ematen dute txertaketa prozesuaren inguruan", adierazi du Osasun sailburuak.
