Publizitatea
Itxi

2021/04/07

18:46

Gizartea

KORONABIRUSA

Europako Agentziak Sputnik V txertoaren "jardunbide kliniko egokiak" aztertuko ditu

N. B. | EITB MEDIA

Europako Batzordeak nabarmendu duenez, EBko eskualdeek estrategia komunitarioaren parte ez diren txertoak eros ditzakete, estatu kide bakoitzaren egitura instituzionalaren arabera.

  • Sputnik V txertoa

    Sputnik V txertoa. Argazkia: EFE.

  • Whatsapp
  • Whatsapp
  • Telegram
  • Bidali

Sendagaien Europako Agentziak "jardunbide kliniko egokien ikuskapen bat" egingo du Errusian, Sputnik V txertoa nola erabili zuten aztertzeko; izan ere, Europako Agentziak txertoa etengabe berrikusten ari da.

Emer Cooke Sendagaien Europako Agentziako zuzendari exekutiboak azaldu duenez, agentziak botikak ebaluatzeko prozesuan jarraitzen duen "prozesu normala" da, eta saiakuntza klinikoek maila zientifiko eta etikoan prozedura egokiak jarraitu zituztela baieztatu nahi du, nazioarteko estandarrak betetzen ote ez zirela ikusita.

"Jardunbide kliniko egokien ikuskapena egingo dugu Errusian. Saiakuntza egiteko moduaren ebaluazio bat da, emaitzak sortzea ahalbidetu zuena. Prozedura normala da hori, eta txerto eta sendagai askorentzat jarraitzen dugu, egin diren saiakuntzei buruz dugun ezagutzaren arabera eta lan egiten dugun beste agintari batzuek ere antzeko ikuskapenak egin ote dituzten kontuan hartuta", azaldu du Cookek.

Sendagaien Europako Agentziak martxoaren 4an abiatu zuen txerto errusiarraren segurtasunari, eraginkortasunari eta kalitateari buruzko datuak "etengabe berrikusteko" prozesua, Europar Batasunean botika hori erabiltzeko baimena eman zezakeena, dagoeneko lizentzia duten txertoekin batera: PFIZER/BioNTech, Moderna, AstraZeneca eta Janssen.

"Gaur egun eskura dagoen ebidentzia aztertzen ari gara, EBn ebaluazioa egiteko beharko genituzkeen estandarrak betetzen ote dituen ikusteko", azpimarratu du Cookek.

Errusiak azaldu duenez, militarrek eta Estatuko langileek txertoaren saiakuntzetan parte hartu dute, Estatuko laborategi batean garatu dute eta Kremlineko Funts subiranoak (Inbertsio Zuzeneko Errusiako Funtsa) finantzatu du.

"Txertoren bat EBko zorroaren parte ez bada, estatu kideek erostea erabaki dezakete"

Kirill Dmitriev Inbertsio Zuzeneko Errusiako Funtseko arduradunak asteazken honetan Financial Times egunkariari esan dionez, Sputnik V txertoak "praktika kliniko guztiak" bete zituen, eta gogorarazi du Sputnik V onartu duten 59 herrialdeetako erregulatzaileek "zorrotz" berrikusi zituztela datuak, eta pozik geratu zirela "jardunbide kliniko ona" bete zutelako.

Bestalde, Europako Batzordeak asteazken honetan azpimarratu duenez, Europar Batasuneko eskualdeek injekzioen estrategia komunitarioaren parte ez diren txertoak eros ditzakete, Sputnik V esaterako, estatu kide bakoitzaren antolakundearen arabera.

Zentzu horretan mintzatu da Brusela, Madrilgo Erkidegoa duela bi hilabete Sputnik V enpresaren hornitzaileekin hitz egiten hasi zela jakin ostean.

"Txerto bat ez bada EBko txertoen zorroan sartzen, estatu kideek erostea erabaki dezakete. Eskualdeak erosteko aukera estatu kide horren egitura instituzionalaren mende dago", adierazi dio Eferi Stefan De Keersmaecker Europako Batzordeko Osasun bozeramaileak.

Zehaztu duenez, injekzio bat EBko zorroan sartzen bada, ez dago baimenduta negoziazio paraleloak egitea edo farmazialariekin kontratuak sinatzea, Europako Batzordea erosketak egiteaz eta txertoak estatu kideen artean banatzeaz arduratzen baita.

Oraingoz, Sendagaien Europako Agentziak lau txerto erabiltzeko baimena eman du: Pfizer-BioNTech, Moderna, AstraZeneca eta Janssen, hain zuzen ere.

Gainera, Bruselak Sanofi-GSK eta CureVac laborategiekin kontratuak itxi ditu, baina horien txertoek Europako Sendagaien Agentziaren oniritzia jaso behar dute oraindik.

Hala ere, Batzordeak ez du Sputnik V errusiarraren dosiak eskuratzeko konpromisorik hartu, ez baita bere injekzio-zorroaren parte, eta ez du Sendagaien Europako Agentziaren bermerik jaso.

Hala ere, Hungaria bezalako estatu kideek beren kabuz erosi dute eta herritarrei administratzen ari dira.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena