Hauek dira Araban, Bizkaian eta Gipuzkoan dauden gurtzarako tokiak

Katolizismoa da Euskal Autonomia Erkidegoan gehien zabalduta dagoen erlijioa, ia milioi eta erdi fededunekin, Ikuspegi Immigrazioaren Euskal Behatokiak eta Pedro Arrupe Institutuak erlijio aniztasunari buruz egindako maparen arabera.

Ondoren ageri dira islama (ia 90.000 pertsona), Eliza ebanjelikoa (ia 30.000 pertsona) eta Eliza ortodoxoa (ia 19.000 pertsona).

Fededun kopuruari begira, Jehovaren lekukoak (4.532) eta animistak (3.434) dira hurrengoak.

Munduko beste erlijio handi batzuei dagokienez, budismoak 1.591 fededun ditu, hinduismoak 955 eta judaismoak 259.

Espero zitekeen bezala, eliza katolikoak dira ugarienak Araban, Bizkaian eta Gipuzkoan. Hiriburuen artean, Gasteiz nabarmentzen da (92), Bilboren (56) eta Donostiaren (34) aurretik. Gurtzarako tokien zerrendako bigarren postuan, ostera, eliza ebanjelikoak daude; Bizkaia da eliza ebanjeliko gehien dituen lurraldea, eta Bilbo dago buruan (35). Kopuruari dagokionez, hirugarren lekuan meskitak daude. Gasteizen daude musulman gehien, eta, beraz, meskita gehien (10); Bilbon, berriz, 6 meskita daude, eta Donostian, 1. Gainera, 14 eliza ortodoxo daude: 5 Bizkaian, 5 Gipuzkoan eta 4 Araban. Halaber, 10 zentro budista daude: 5 Donostian, 4 Bilbon eta 1 Gasteizen.

Hala ere, ez dago ez sinagogarik ez tenplu hinduistarik Araban, Bizkaian eta Gipuzkoan.