Itxi

Gizartea

Erasoa

Beste gizon bat atxilotu dute Zornotzako erasoarengatik, bederatzigarrena dagoeneko

EITB MEDIA

Ostiralean, epaileak bi gizonezko espetxeratzea agindu zuen, eta hirugarren bat aske geratu zen, hilean behin epaitegian aurkezteko betebeharrarekin.

0:53
Beste gazte bat atxilotu dute Zornotzako erasoarekin lotuta, bederatzigarrena jada

Barakaldoko Udaltzaingoak gizonezko bat atxilotu du gaur goizaldean, Lemoako gazteari asteburuan egindako eraso bortitzarekin zerikusia duelakoan. Gauzak horrela, bederatzi pertsona atxilotu dituzte dagoeneko.

Eusko Jaurlaritzako Segurtasun Sailak jakitera eman duenez, larunbat honetan, 01:00ak aldera, atxilotu dute; udaltzainek erasoarekin lotura izan dezakeen susmagarrietako bat topatu dutenean.

Hori dela eta, udaltzainek gizona identifikatu eta ertzain-etxera eraman dute. Atxilotua ertzain-etxean dago oraindik, epailearen esku geratzeko zain.

Testuinguru horretan, Angel Madrazo Barakaldoko Herri Segurtasuneko eta Babes Zibileko zinegotziak azaldu duenez, Barakaldoko Udaltzaingoak erasoarekin zerikusia izan duten susmagarrien izen-abizenak dakizki.

Bederatzi pertsona atxilotu dituzte dagoeneko. Atxilotutakoak, 15 eta 38 urte artekoak, Koala Anaiak izeneko talde gatazkatsu eta bortitz bateko kideak dira, eta aurrekari ugari dituzte Bizkaian antzeko beste hainbat eraso egiteagatik.

Ostiralean, epaileak bi gizonezko espetxeratzea agindu zuen, eta hirugarren bat aske geratu zen, hilean behin epaitegian aurkezteko betebeharrarekin. Bost adingabeak Fiskaltzaren aurrean aurkeztu zituzten.

Guztira, hogei bat pertsonak parte hartu zuten erasoan, denek "modu aktiboan".

Gertatutakoaren kontaketa 

Segurtasun Sailaren arabera, larunbatetik iganderako gauean, 03:30ean, Zornotzako Jauregibarria parkean mutil bat zaurituta zegoela jakinarazi zioten Ertzaintzari; antza denez, eraso baten biktima izan zen. 

Ertzaintzaren eta Udaltzaingoaren patruilak eta anbulantzia bat bertaratu ziren. Gaztea konorterik gabe eta hainbat zauri zituela aurkitu zuten, eta Gurutzetako Ospitalera eraman zuten, larri. 

Iturri horren esanetan, hogei bat gaztek osatutako talde batek "sekulako jipoia" eman zion biktimari. Modu antolatuan jokatuz, inguratu egin zuten "inolako babesik gabe" utzita eta gehiago zirela aprobetxatuta. Guztiek hartu zuten parte erasoan, "modu aktiboan", Ertzaintzaren hitzetan. 

Erasotzaileek objektu sendoak erabili zituzten, makilak eta botilak, besteak beste, biktima konorterik gabe lurrean botata utzi arte. Nolanahi ere, taldeak kolpeka jarraitu zuen, eta biktimari bere ondasunak ostu ondoren, ihes egin zuten. 

Ondorengo orduetan jakin zen erasotzaileek gertakaria grabatu zutela eta sare sozialen bidez erasoaren irudiak zabaltzen ari zirela. 

Ertzaintzak baieztatu duenez, erasoan parte hartu zuten pertsona berberek gau hartan beste eraso eta lapurreta batzuetan parte hartu zuten. Gutxienez beste lau gaztek jasan zituzten horien erasoak eta lapurretak.

  • Bisitatuena

      Kargatzen ikusiena
      Kargatzen ikusiena