Gizartea -
AFGANISTAN
22 errefuxiatu afganiar hartu ditu dagoeneko EAEk
Familiak dira, bikoteak edo seme-alabak dituztenak, eta harrera-pisuetan kokatuko dira; horietatik 15 Bizkaian eta 7 Gipuzkoan.
AGENTZIAK | EITB MEDIA
Errefuxiatuak Afganistandik ebakuatzen ari dira oraindik, baina Euskal Autonomia Erkidegoak 22 afganiar hartu ditu dagoeneko, talibanek boterea hartu ostean.
Horietako bederatzi errefuxiatu aste hasieran heldu ziren EAEra, eta gainerakoak Madrildik eraman dituzte gaur goizaldean, Patricia Barcena CEAR Errefuxiatuei Laguntzeko Batzordeko Euskadiko zuzendariak azaldu duenez.
Familiak dira, bikoteak edo seme-alabak dituztenak, eta harrera-pisuetan kokatuko dira; horietatik 15 Bizkaian eta 7 Gipuzkoan.
Afganistanen zeudela, nazioarteko erakundeekin elkarlanean aritu ziren guztiak, eta nolabaiteko harremana izan zuten Espainiako Estatuarekin. Profil profesional ezberdinak dituzte: langileak, kirolariak eta giza eskubideen aldeko ekintzaileak, besteak beste.
Eusko Jaurlaritza eta Nafarroako Gobernua hasiera-hasieratik kezkatuta agertu ziren talibanak agintera iristearekin, eta babes bila ari diren Afganistango herritarrei harrera egiteko prest zeudela jakinarazi zuten. Hala, asteburuan Foru Erkidegoak Afganistandik etorritako familia bereko zortzi kide hartu zituen.
CEARek 101 errefuxiatu afganiar hartu ditu Espainiako Estatu osoan, eta Torrejon de Ardozko aireportuan heldu berriekin pistan bertan lan egin ostean, dagoeneko bere pisu kopurua bete du, baina beste erakunde batzuek eskainitako leku gehiago daudela zehaztu du. Araba, Gipuzkoa eta Bizkaiko zentroetan 515 plaza daude errefuxiatuentzat.
