Gizartea -
Koronabirusa
Janssenen txertoa jaso zutenei errefortzuko dosia ziztatzen hasi da Osasun Saila
EAEn ia 100.000 pertsona dira. Osasunbideak datorren astean abiatuko du txertaketa, adinez nagusienak diren pertsonak lehenetsita.
Eider Garaikoetxea O. | EITB Media
Euskal Autonomia Erkidegoan (EAE) Janssenen txertoa jaso zutenei, ia 100.000 pertsonari, errefortzuko dosia ematen hasi da Osasun Saila, Osakidetzaren bitartez. Pfizer edo Moderna farmazia etxeen prestakina jarriko diete.
Atzo lehen ziztadak eman bazituzten ere, txertaketa gaur hasi da modu orokortuan. Osasun zentroak erabiltzen ari dira horretarako.
Osakidetzak astelehenean zabaldu zuen hitzordua hartzeko aukera, eta telefonoz edo webgunearen bitartez eska daiteke.
Modernaren kasuan, 0,25 mililitrokoa izango da dosia (jarri ohi denaren erdia), eta Pfizerrenean, 0,3 mililitrokoa (ohikoa).
Nafarroan, txertaketa datorren astean abiatuko du Osasunbideak. Osakidetzak ez bezala, adinez nagusienak diren pertsonak babestuz ekingo diote prozesuari.
Hainbat ikerketaren arabera, Janssenen dosi bakarreko txertoa da koronabirusaren aurka babes maila txikiena duena eta eraginkortasuna arinen galtzen duena.
