EBn korridore humanitario seguruak sortzeko "oinarririk" ez dagoela uste du Escrivak

Jose Luis Escriva Inklusio, Gizarte Segurantza eta Migrazio ministroak uste du EBn igarobidean dauden pertsona migratzaileentzat korridore humanitario seguruak sortzeko "oinarririk" ez dagoela, nahiz eta Eusko Jaurlaritzak eskatu, "jarrera ezberdinak" daudelako.

Hala eta guztiz ere, "noizbait" Dublingo itun berri bat sinatzea espero du ministroak. Espainiak "elkartasun jarrerak" defendatzen ditu Bruselan, azpimarratu duenez.

Frantziako eta Europako agintarien aurrean bitartekaritza lanak egitea eskatu zion Beatriz Artolazabal sailburuak ministroari gutun batean, azaroaren 22an, igarobidean dauden pertsona migratzaileentzat korridore humanitario seguruak sortzeko helburuarekin. Bi egun lehenago, Bidasoa ibaian, Irunen (Gipuzkoa), pertsona migratzaile bat hil zen, muga zeharkatzeko saiakeran.

Donostiako Gureak enpresaren sarreran adierazpenak egin ditu ministroak. Escrivaren hitzetan, Espainiako Gobernuaren "legezko migrazio seguruaren aldeko apustua argia da".

"Migrazioaren gaia, Mantxako kanalean ikusten ari garenarekin, gai konplexua da. Europa mailako Migrazio eta Asilo Itun Berri batean aurrerapausoak eman behar ditugu. Europan jarrera ezberdinak daude gaiaren inguruan. Herrialdeen arteko elkartasuna ardatz izan behar dela defendatzen du Espainiak", nabarmendu du Escrivak.

Bizitzeko gutxieneko diru-sarrera

Bestalde, Euskadik bizitzeko gutxieneko diru-sarrera (BGDS) "osorik" kudeatzeko "ibilbidearekin" konbentzituta azaldu da ministroa, "foru berezitasunagatik, kasu batzuetan errenta eta ondare datuak gurutzatu behar direlako foru ogasunekin". Gainera, Euskadik "konpromiso argia du politika horiekin, beste erkidego batzuek baino handiagoa", onartu du Escrivak.

Ministroaren ahotan, Eusko Jaurlaritzarekin "elkarlanerako tarte oso handia dago, Gizarte Segurantzako prestazio askotan".