Covid ziurtagiria ezartzeak hiru puntu igoarazi du txertaketa maila, Sagarduik nabarmendu duenez

Gotzone Sagardui Eusko Jaurlaritzako Osasun sailburuak nabarmendu duenez, covid ziurtagiria ezartzeak hiru puntu igoarazi du "atzeratuen zeuden taldeen" (20-29 urteko eta 30-39 urtekoen artekoak) txertaketa maila. Igoera horrek, sailburuaren ustez, neurria "eraginkorra" dela erakusten du, eta hori dela eta, otsailaren 13ra arte eskatzen jarraitzeko baimena galdegin dio EAEko Auzitegi Nagusiari.

Sagardui Legebiltzarrean izan da gaur, astero pandemiaren bilakaeraren berri emateko Osasun Batzordean egin ohi duen agerraldiaren testuinguruan. Datu epidemiologikoen berri eman du, aurrena. Azaldu duenez, azken 14 egunetako intzidentzia tasa metatua 3.134 kasukoa da 100.000 biztanleko, eta ospitaleetako presioa apur bat jaitsi da (624 pertsona daude gela arruntetan eta 92 ZIUetan). Sagarduiren aburuz, "beherakada motela" atzematen ari dira, eta "zuhurtzia"ri eusteko deia egin du.

Oposizioko taldeek (Vox, PP+Cs, Elkarrekin Podemos-IU eta EH Bildu) estu hartu dute sailburua, eta Jaurlaritzak hartu dituen neurrien "eraginkortasuna aztertzeko txostena" eskatu diote, covid ziurtagiriarena, besteak beste.

Horren harira, Sagarduik jakinarazi du ziurtagiria ezarri zenetik hiru puntu dela gazteriaren txertaketa maila, eta azpimarratu du ez dela halako igoerarik izan aurreko  epeetan. "Beste prebentzio neurriekin batera, neurri eraginkorra dela frogatu du ziurtagiriak". Era berean, argitu du EAEko Auzitegi Nagusiari helarazitako eskaeran hotelak eta joko-aretoak ere aipatzen direla, baina "esplizitu egin" nahi izan dutelako izan da, bi leku horietan "jada eskatzen zutelako" (ostalaritza jarduera eskaintzen duten aldetik).