10 urteko kartzela-zigorra ezarri diote Gasteizen neska-lagun ohiaren bikotekidea hil zuen gizonari

Arabako Lurralde Auzitegiak 10 urteko kartzela-zigorra ezarri dio Gasteizen neska-lagun ohiaren bikotekidea hil zuen gizonari.

Aurrez, herri-epaimahaiak emandako epaia berretsi du Arabako Lurralde Auzitegiak. Herri-epaimahaiak errudun jo zuen, homizidio delitua egotzita, akusazioek eta defentsak akordioa lortu eta hasierako 12 urte eta erdiko kartzela-zigor eskaera 10 urtera murriztu ondoren.

Hasieran, 28 urteko erasotzaileak adierazi zuen 18 urteko gazteari sorbaldan zauria egitea zela bere asmoa. Gerora, ordea, onartu egin zuen hasieratik izan zuela biktima hiltzeko asmoa.

Epaiaren arabera, 2021eko otsailaren 10ean Gasteizko Flandria kalean egin zion eraso, kondenatuak biktima sastatu baitzuen eztabaida izan ondoren.

Kartzela-zigorraz gain, hiltzaileak 350.000 euroko kalte-ordaina eman beharko dio hildakoaren familiari.