Gizartea -
Indarkeria matxista
Adingabe batek sexu-eraso bat salatu du Algortako Portu Zaharreko jaietan
Adingabeak Udaltzaingoan salatu duenez, gazte talde batek sexu-ukituak egin dizkio. Gainera, beste adingabe batek ziztatua izan dela salatu du Polizian ere. Tokiko Mugimendu Feministak elkarretaratzea deitu du arratsaldeko 19:00etarako, murrutzar handian.
EITB MEDIA
Algortako Portu Zaharreko jaietan sexu-erasoa jasan duela salatu du adingabe batek, Getxoko Udalak zabaldutako oharraren arabera. Getxoko Udaltzaingoaren aurrean salatu duenez, 6 eta 8 gizon bitarteko talde batek adingabea inguratu du Algortako auzoan jarritako eszenatokitik gertu dagoen lorategi-gunean, eta sexu-ukituak egin dizkiote. Azkenean, gazteek eraso saiakerari uko egin diote eta bertatik alde egin dute.
Bestalde, Getxoko Udalak ohar berean jakitera eman duenez, beste adingabe batek ziztada bat jasan duela salatu du Udaltzaingoaren aurrean, Portu Zaharreko jai-esparruan, alegia. Urdulizeko ospitalera eraman dute, eta egindako toxikologia-probek emaitza negatiboa eman dute.
Erasoon aurrean, Algortako Mugimendu Feministak jaietako protokoloa aktibatu eta elkarretaratzea deitu du gaurko. Arratsaldeko 19:00etan jarri dute hitzordua, Portu Zaharreko murrutzar handian.
