Emakumezko batek sexu erasoa salatu du Iruñean

Iruñeko Udalak igande honetan ohar baten bidez jakinarazi duenez, emakumezko batek sexu erasoa pairatu zuen atzo gauean.

Gertatutakoa gaitzetsi dute Udaleko talde guztiek, eta emakumeari "elkartasun osoa" adierazi diote. Haren eskubideak zein intimitatea zorrotz babestu behar direla gaineratu dute. 

"Indarkeria sexistak emakume orori eragiten dio eta ez du zerikusirik adinarekin, egoera sozioekonomikoarekin eta naziotasunarekin. Edozein unetan gerta daitezke, nahiz eta aisialdiko inguruak eta gaua izan eraso gehien gertatzen diren momentuak. Botere harremanetan oinarritzen dira erasoak, plano sinboliko zein materialean gizona emakumearen gainetik jarriz. Indarkeria sexista hauek forma eta jarrera ezberdinetan gertatzen dira" salatzen du oharrak.

Hala, "indarkeria sexistak hautematea, seinalatzea, baztertzea eta gaitzestea ezinbestekoa eta premiazkoa da adierazpen sexista guztiak desager daitezen" dio Udalak oharrean.

Ildo horretan, eraso sexisten aurrean jarrera aktiboa erakusteko eta emakumeak babestuko dituen eredu sozial eta kulturala lortzen laguntzeko eskatu diete Iruñeko herritar guztiei, "festen edo ohituren aitzakian erasotzailea inoiz justifikatu gabe ".