Gizartea -

Eraso matxista

Emakume batek sexu erasoa salatu du Basaurin

Tokiko eragile feministek elkarretaratzea egin dute, Social Antzokian.

EITB MEDIA

Whatsapp Facebook Twitter Telegram Email

Emakume batek sexu erasoa jasan duela salatu zuen joan den igandean, urriaren 9an, Basaurin. Ertzaintza gertatutakoa ikertzen ari da, eta Bizkaiko udalerriko udal talde guztiek tokiko talde feministek gaur arratsalderako deitu duten elkarretaratzean parte hartzeko deia egin diete herritarrei.

Salaketaren berri izan ostean, Basauriko Udalean ordezkaritza duten alderdi guztietako bozeramaileek (EAJ, PSE-EE, EH Bildu, Elkarrekin Podemos-IU eta PP) deitoratu egin dute eraso matxista, eta "gaitzespen irmoa" agertu dute "emakumeen aurkako indarkeriaren adierazpen honen aurrean".

Gainera, erasoa jasan duen emakumeari eta haren inguruari babesa adierazi diote, eta behar dituen udal-baliabide guztiak jarri dituzte haren esku.

"Erasorik erantzun sozial eta instituzionalik gabe gera ez dadin, dei egiten diegu herritarrei Berdintasun Kontseiluak, Herriko Taldeek eta Basauriko mugimendu feministak asteazken honetarako, 19:30erako, Social Antzokian deitu duten elkarretaratzearekin bat egiteko", zabaldu dute taldeek.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.

Hau zure interesekoa bada, baliteke beste gai hauek ere izatea
Basauri Indarkeria matxista Gizartea Indarkeria matxistaren biktimak Eguneko albisteak Albisteak Matxismoa Feminismoa