Gizartea -

INDARKERIA MATXISTA

Gizon bat atxilotu dute Santurtzin, bikotekidea hiltzen saiatzeagatik

Labanaz zauritu du emakumea, eta Gurutzetako Ospitalera eraman behar izan dute biktima. Atxilotua 37 urteko gizonezkoa da. Santurtziko Udalak Bozeramaileen Batzordea deitu du astelehenerako, gertatutakoa salatzeko.

AGENTZIAK | EITB MEDIA

Whatsapp Facebook Twitter Telegram Email

37 urteko gizonezko bat atxilotu du gaur goizean Ertzaitzak bere bikotekidea labankatzeagatik. Heriotza saiakera leporatzen diote. Biktima ospitalera eraman behar izan dute.

10:30 aldera, Santurtziko etxebizitza batean eraso bat gertatzen ari zelako abisua jaso du Ertzaintzak. Bertara iritsitakoan, emakume bat topatu dute zauriturik. Lepoan eta besoan zauri larriak zituela ikusita, Gurutzetako Ospitalera eraman dute emakumea, Ertzaintzak jakitera eman duenez.

Ustezko egilea, berriz, haren bikotekidea, atxilotuta eraman dute, homizidio ahaleginaren ustezko delitua leporatuta.

Beatriz Artolazabal Berdintasun, Justizia eta Gizarte Politiketako sailburuak adierazi duenez, ezerk ez du justifikatzen gaur gertatutakoa bezalako "eraso matxista bat eta, are gutxiago, hilketa saiakera bat", eta Eusko Jaurlaritzaren "baliabide guztiak" biktimaren zerbitzura jarri ditu.

Bere aldetik, Santurtziko Udalak Bozeramaileen Batzordea deitu du astelehenean, 09:00etatik aurrera, gertatutakoa salatzeko.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.

Hau zure interesekoa bada, baliteke beste gai hauek ere izatea
Ertzaintza Indarkeria matxista Herriak eta Hiriak Santurtzi Bizkaia Euskal Autonomia Erkidegoa Delituak Gizartea Indarkeria matxistaren biktimak Eguneko albisteak Albisteak Matxismoa