Abisu horia larunbat honetan elurragatik EAEn eta Nafarroan

Eusko Jaurlaritzako Segurtasun Sailak abisu horia ezarri du larunbat honetarako, 700 metrotik gorako lekuetan elurra egin dezakeelako. Iganderako ere abisu bera aktibatuko du Arabako zenbait tokitan izotza egin dezakeelako.

Elur-kota 700 eta 1.000 metro artean kokatuko da larunbat honetan. Abisu horia goizeko seietan hasi, eta egun guztian zehar egongo da indarrean. Barnealdeko zenbait menditan, gauez, izotza egitea espero da; 5 cm-ko lodiera izango du, gehienez, 1.000 metrotan, eta 1 cm-koa, gehienez, 600 metrotan. Halaber, euria egitea espero da, batez ere kantauri isurialdeko mendebaldean, eta gauean, atertzera egingo du.

Gainera, Nafarroako Foru Erkidegoan ere alerta ezarri dute elurragatik, Pirinioetan 1.300 metrotara botako duelako, eta 24 ordutan 5 zentimetroko elur-lodiera pilatuko delakoan.

Igandean, berriz, abisu horia ezarriko da gauerditik goizeko hamarrak arte, Arabako zenbait tokitan izotz txikia egon daitekeelako. Igandetik astelehenera bitartean ere indarrean egongo da abisu hori, ordutegi berean.