Sexu erasoak % 18 igo dira urtebetean Euskadin

Emakunde Emakumearen Euskal Institutuak jakitera eman duenez, aurtengo urtarriletik urrira, 433 emakumek salatu dute sexu erasoren bat Euskal Autonomia Erkidegoan; iaz, denbora tarte berean baino % 18 gehiagok.

Araban igo dira gehien delitu hauek, % 72, hain zuzen ere: 39 salaketa izan ziren 2021ean, eta 67, aurten.

Bizkaia % 22 igo dira: 189 eraso iaz, eta 231, aurten.

Gipuzkoan, dena dela, % 3 jaitsi dira: 139 iaz, eta 135, aurten.

Bikotekideen zein bikotekide ohien indarkeria jasan duten emakumeen kopurua ere igo egin da

Bikotekidearen edo bikotekide ohiaren biktima izan diren emakumeen kopurua ere % 15,5 igo da denbora epe horretan, Emakunderen datuen arabera: 2.876 salaketa jarri dira, iaz baino 387 gehiago.

Lurraldeka, % 24 igo dira kasu hauek Gipuzkoan: 927 emakume eraso dituzte bikotekideek eta bikotekide ohiek, aurreko urtean baino 179 gehiago.

Araban, 459 emakumeri egin diete eraso, aurreko urtean baino % 19 gehiagori.

Bizkaian, bestalde, eraso kopuruak % 10 egin du gora: 1.355 izan ziren 2021ean, eta 1.490 izan dira aurten.

Familia barruko indarkeriak ere gora egin du, baina gutxiago

Familia barruko indarkeria ere, bikotekidea edo bikotekide ohia ez den baina familiako kide den norbaitek eragiten duena, igo egin da. 826 emakumek salatu dituzte mota horretako erasoak urteko lehen 10 hilabeteetan (% 3,4 gehiago).

Indarkeria mota hau % 12,6 igo da Gipuzkoan (277 emakume aurten, iaz 246), % 0,8 igo da Araban (130, aurten, eta 129, iaz) eta; aldiz, % 1,2 jaitsi da Bizkaian (419 aurten eta 424 iaz).