Gizartea -
Rubiales auzia
Jenni Hermosok txalo zaparrada jaso du Women's Cupeko finalean palkoan agertu denean
Berdegunean, bi taldeetako jokalariek eta euren teknikariek "Jennifer Hermoso, zurekin" leloa zeraman pankarta batekin argazkia atera zuten partida hasi aurretik. Sevillako eta Cadizeko gizonezkoen taldeko jokalariek ere babesa eman diote Hermosori.
EITB MEDIA
Jennifer Hermoso, Mexikoko Pachuca taldeko jokalari internazional eta Munduko futbol txapelduna, larunbat honetan agertu zen berriro Madrilgo Wanda Alcala de Henares Kirol Zentroan, Atletico Madril eta AC Milan taldeen arteko Women's Cupeko finala ikustera. Berdegunean, bi finalistetako jokalariek eta euren talde teknikoetako kideek "Jennifer Hermoso, zurekin" leloa zeraman pankarta batekin atera zuten argazki bat partida hasi aurretik. Ikusle askok ere lema bera zuten kamisetak zituzten jantzita.
Jokalaria albiste izan da egunotan; izan ere, Luis Rubiales atzo arte Espainiako Futbol Errege Federazioko (RFEF) presidenteak ahoan musu bat eman zion Hermosori Munduko Txapelketaren finalaren ostean, jokalariaren baimenik gabe. Horrek zalaparta eragin du nazioartean, eta, ondorioz, FIFAk behin behinean kargutik kendu du Rubiales.
Elkartasun olatua Hermosorekiko
Larunbat honetan ere, Ramon Sanchez-Pizjuan futbol-zelaian, Sevillako jokalariak, Gironaren aurkako partidaren aurretik, zelaian agertu ziren "#AmaituDa" leloa idatzita zuten kamisetekin, Hermosori elkartasuna adierazteko. Era berean, Olga Carmona omendu zuten, Espainiako selekzioak Munduko Txapelketako finalean Ingalaterrari irabazteko gola sartu zuena eta Sevillan jokalari gisa trebatu zena.
Bestalde, Cadizeko jokalariek ere babesa eman zioten Hermosori, Mallorcaren aurkako partida hasi aurretik eraman zuten pankarta batekin: "Denok gara Jenni". Partiduan zehar, estadioko ikusleek ere bat egin zuten aldarrikapenarekin, "Luis Rubiales dimisioa" oihukatuz.
