Bulgariarren eta errumaniarren sarrera masiboaren beldur da Europa

2014ko urtarrilaren 1etik aurrera Errumaniako eta Bulgariako herritarrek Europar Batasuneko herrialdeetan barrena libreki mugitzeko eta lan egiteko eskubidea izango dute, eta Europako herrialdeak bulgariarren eta errumaniarren olde baten beldur dira.

Bulgaria eta Errumania 2007an sartu ziren Europar Batasunean eta geroztik bi herrialde horietako herritarrek kide diren herrialdeetan barrena libreki mugitzeko eta bizitzeko aukera dute.

Enplegu arloan, ordea, Europar Batasuneko 19 herrialdek soilik ireki zizkien Errumaniako eta Bulgariako langileei ateak. Beste 8 herrialdek, Belgika, Alemania, Frantzia, Luxenburgo, Malta, Herbehereak, Austria, eta Erresuma Batuak kasu, aldi baterako neurriak ezarri zituzten Errumaniako eta Bulgariako langileei sarbidea mugatzeko. Espainiak, berriz, errumaniarrei aldi baterako murrizketak ezarri zizkien.

Urtarrilaren 1etik aurrera, neurri horiek bertan behera geldituko dira bulgariarrek eta errumaniarrek libreki Europar Batasuneko edozein herrialdetan lan egin dezaten. Halaber, gainerako europarren eskubide eta betebehar berdina izango dituzte.

Erresuma Batua eta Alemania bereziki kezkatuta daude, eta neurriak ezartzea aztertzen ari dira.

David Cameron lehen ministro britainiarrak hainbat neurri hartu nahi ditu: Europar Batasunetik datozen etorkinek lehen hiru hilabeteetan jasotzen dituzten laguntza sozialak kentzea, etxebizitzarako laguntzak deuseztea, lanik ez duten etorkinei subsidioa kentzea eta kalean bizi diren Europar Batasuneko herritarrak beren herrialdera deportatzea.

Alemaniak aipaturiko bi herrialdeetako 100.000-180.000 etorkin espero ditu, eta Angela Merkelen alderdiarekin senidetuta dagoen alderdi kristaua neurriak hartzea aztertzen ari da, egunkari alemaniar batek gaur argitaratu duenez.