Mundua -
Immigrazioa
34 etorkin hil dira Egeoko uretan izandako bi hondoratzetan
Aurreneko urperatzea Edremit inguruan izan da, Balikesir probintzian. Bertako kostazainek jakitera eman dutenez, 23 gorpu atera dituzte uretatik. Beste hondaratzea, berriz, Dikiliko kostan izan da.
agentziak | erredakzioa
Gutxienez 34 etorkin zendu dira, gaur, Egeko uretan izandako bi hondoratzetan; Turkia eta Greziako irlen arteko bidea egiten ari ziren bi ontziok.
Lehendabiziko urperatzea Edremit inguruan izan da, Balikesir probintzian, Turkia iparraldean. Bertako kostazainek jakitera eman dutenez, 23 gorpu atera dituzte uretatik. Lau lagun bizirik erreskatatu dituzte.
Beste 13 lagun zihoazen barkuan, baina ez dute horien arrastorik. Haien bila ari dira, itsasoz eta airez.
Bestalde, Dogan berri agentziak jakitera eman duenez, 11 gorpu atera dituzte Dikiliko kostan, Esmirna probintzian, ontzi bat hondoratu ondoren. Hiru lagun bizirik erreskatatu dituzte.
Migrazioen Nazioarteko Erakundeak joan den astean kaleratu zuenez, urtea hasi zenetik, 74.676 pertsona iritsi dira Europara itsasoz, 68.778 Greziatik. 374 pertsona hil dira bide horretan, 284 Egeoko uretan.
