Mundua -
Gatazka Saharan
Marokok bideo batekin justifikatu du Aaiungo sarraskia
- Sahararren protesta baketsua Al Kaidarekin alderatu du Rabatek.
- Rubalcabak Marokoko Barne ministroa hartuko du gaur.
- NBEko Segurtasun Kontseiluak krisia hizpide hartuko du.
Erredakzioa
Taieb Cherqaoui eta Taib Fassi Fihri Marokoko Barne eta Atzerri ministroek bideo bat publikatu dute Aaiungo kanpamendua indarrez desegin izana justifikatzeko. Operazio horretan hainbat pertsona hil ziren (Marokoko 10 polizia eta Saharako bi zibil Rabaten esanetan, eta gutxienez 19 zibil Polisarioaren arabera).
Hain zuzen ete, bi ministroek salatu dute kanpamendua husteko orduan agenteek Saheleko hegoaldean erabiltzen diren indarkeria metodoei (Magrebeko Al Kaidak erabilitakoak) aurre egin behar izan zietela.
Prentsaurrekoan, NBEko negoziaketan "distrazio estrategia bat" erabiltzea leporatu die Fronte Polisarioari eta Aljeriari Fassi Fihrik. Aaiuneko azken gertakariak estrategia horren barruan kokatu ditu ministroak, MAP albiste-agentzia ofizialak jakitera eman duenez.
Hala ere, Rabatek elkarrizketarekin duen konpromisoa mantentzen duela azaldu du Fassi Fihrik, ondorioz, "ez da" negoziazioko oztopoen erantzule.
Gdem Izikeko kanpamentua husteko liskarrek "negoziaketa klima gaiztotu" nahi dutela argi uzten dute, Atzerri ministroaren hitzetan. Segurtasun indarren erasoaren "izaera baketsu saihestezina" defendatu du agintariak.
NBEko Segurtasun Kontseiluak gaur aztertuko du krisia
Bestalde, Nazio Batuen Erakundeko (NBE) Segurtasun Kontseiluak gaur aztertuko du Saharako krisia.
Azken gertakariei buruz informazioa batuko dute, eta seguru aski NBEk han duen misioaren (Minurso) datuak entzungo dituzte.
Rubalcabak Marokoko Barne ministroa hartuko du
Testuinguru honetan, Alfredo Perez Rubalcaba Espainiako Gobernuko lehen presidenteorde eta Barne ministroak Taib Charkaui Marokoko Barne ministroa hartuko du gaur.
Arratsaldean, oposizioak azalpenak eskatuko dizkio Gobernuari Senatuan, ez baitu gaitzetsi Aaiungo sarraskia.