Bill Cosby aktoreari 10 urte arteko espetxe-zigorra ezarri diote sexu-abusuengatik

Norristowneko (Pennsylvania, AEB) epaitegiak Bill Cosby komikoari hiru eta hamar urte arteko espetxe-zigorra ezarri dio sexu-abusu delituengatik.

Sententzia irakurtzeko bigarren egunean, hamar urte arteko kartzela-zigorra ezarri dio epaileak aktoreari. Zigortua “sexu harrapari bortitza” dela azaldu du magistratuak epaian.

Epaimahai batek komikoa errudun jo zuen apirilean, baimenik gabe, konorterik gabe eta estupefazienteak eman ondoren koitoa gauzatzea egotzita.

“Sexu harrapari bortitza” bezala deskribatzeak Cosby erasotzaileen zerrendan sartzea ekarriko du. Erregistroa ikastetxeetara bidaliko dute. Gainera, aktoreak terapia saioak jasoko ditu bere bizitza osoan zehar.

Andrea Constand kanadarrari 2004an egindako sexu-erasoa epaitu dute. Komikoak Cheltenhamgo (Pennsylvania) luxuzko etxera gonbidatu zuen, artistak pilula batzuk eman zizkion, eta zorabiaturik zegoela eraso egin zion.

Hiru hamarkadako zigorra jasotzeko aukera zegoen, baina fiskalak berak bost eta hamar urte arteko espetxealdia eskatu zuen.

1960tik 2000ra bitartean 60 emakume baino gehiagok Bill Cosby salatu dute sexu-abusuengatik, baina auziek ez zuten aurrera egin preskribatu zirelako. Constanden alegazioak bakarrik heldu dira epaiketara.