Mundua -
Ikerketa
Turkiak ez du Khashoggiren DNArik aurkitu Saudi Arabiaren kontsulatuan
Turkiako kazeta baten arabera, kazetaria ito egin zuten eta, jarraian, substantzia bat injektatu zioten odola gatzatzeko, gorpua zatikatzerakoan, arrastoak uzteko arriskua murrizteko asmoz.
AGENTZIAK | ERREDAKZIOA
Saudi Arabiak Istanbulen duen kontsulatuan abiatutako miaketetan Turkiako Fiskaltzak ez du Jamal Khashoggi kazetariaren DNAren arrastorik aurkitu, Hürriyet Turkiako kazetak zabaldu duenez.
Turkiako adituek laginak hartu zituzten kontsulatuan eta kontsularen etxebizitzan, krimena izandako beste leku bat zelakoan. Gainera, kontsulatuaren hainbat auto ofizialetan ere miaketak egin zituzten. Laborategiaren analisiek argitu dutenez, lagin horiek ez dute Khashoggiren DNArik.
Hürriyet egunkariak agerian utzi duenez, kontraesana dago Turkiako eta Saudi Arabiaren Fiskaltzen bertsioen artean: lehenak dio Khashoggi itota hil egin zela; Saudi Arabiako Fiskaltzaren ustez, berriz, "lo-eragilearen dosi handi" baten ondorioz hil zen kazetaria.
Aipatutako egunkariaren arabera, Saudi Arabiak 15 agente bidali zituen kazetaria hiltzeko: lehendabizi, ito egin zuten eta, jarraian, substantzia bat injektatu zioten odola gatzatzeko, gorpua zatikatzerakoan, arrastoak uzteko arriskua murrizteko asmoz.
