Sorturen bultzatzaile batek ETArekin harremana duen ikertuko dute

Sonia Respaldiza Bombin Sorturen bultzatzaileetariko batek ETArekin izan lezakeen harremana argitzeko ikerketa bat zabaldu du Auzitegi Nazionaleko Fiskaltzak. Izan ere, antza denez, Respaldizaren izena Ibon Fernandez Iradi Susper ETAko buruzagi ohiari atzemandako agirietan agertzen zen.

Iturri juridikoek gaur jakitera eman dutenez, Respaldizak ETArekin duen ustezko loturaren datuak bilduta dituenean, Fiskaltzak Auzitegi Nazionalari igorriko dio ikerketa.

Respaldiza "Susper-en paperetan" agertzen da. Paper horiek ETAko kide askoren atxiloketan lagundu dute. Gainera, Estatuko Abokatutzak eta Fiskaltzak Sortu eta ETAren arteko lotura frogatzeko erabili dituzte, Auzitegi Gorenaren aurrean aurkeztutako salaketetan.

Sonia Respaldiza Bombinen izena Susper-en dokumentuetan azaltzen da. ETAko "kide izateko aukeraz mintzatzen dira agirietan, talde armatu bateko kide izateko aukeraz (''egurra emateko'')", dio Fiskaltzak.

Abokatutzaren eta Fiskaltzaren esanetan, Respaldiza "erradikala" dela argi uzten du horrek, "kide berriak hartzeko ardura zuten ETAko kideen aurrean berak azaldu bezala".